මැදපෙරදිග ගැටුම අඛණ්ඩව උත්සන්න වී ගල්ෆ් කලාපය පුරා පිහිටි බලශක්ති යටිතල පහසුකම් මධ්‍යස්ථාන ප්‍රහාරවල ඉලක්ක වීමත් සමඟ බ්‍රහස්පතින්දා ආසියානු වෙළඳාමේදී තෙල් මිල තියුණු ලෙස ඉහළ ගොස් තිබේ.

ඒ අනුව මෙම වාර්තාව සටහන් කරන අවස්ථාව වන විට බ්‍රෙන්ට් බොරතෙල් 4.27%කින් ඩොලර් 112.00 දක්වා ඉහළ ගොස් තිබූ අතර, WTI බොරතෙල් 2.73%කින් ඩොලර් 98.95 දක්වා ඉහළ ගොස් තිබිණි.

සිය දකුණු පාර්ස් ගෑස් ක්ෂේත්‍රයට එල්ල කළ ප්‍රහාරවලට පළිගැනීමක් ලෙස ඉරානය මැදපෙරදිග පුරා බලශක්ති යටිතල පහසුකම් ඉලක්ක කිරීමෙන් පසු මෙම නවතම මිල ඉහළ යෑම සිදුවිය.

ඉරාන මිසයිල ප්‍රහාර මගින් ලොව විශාලතම ද්‍රව ස්වාභාවික ගෑස් පහසුකම සහ ගෝලීය ගෑස් සැපයුමේ මුල් ගලක් වන රාස් ලෆාන් කාර්මික සංකීර්ණය වටා දැඩි හානියක් සිදුවී ඇති බව කටාර් රාජ්‍යය තහවුරු කළේය.

මේ අතර, මිසයිල ආශ්‍රිත සිදුවීම්වලින් පසු එක්සත් අරාබි එමීර් රාජ්‍යය එහි හබ්ෂාන් ගෑස් පහසුකමේ මෙහෙයුම් අත්හිටුවා ඇති අතර, බාබ් තෙල් නිධිය ඇතුළු අතිරේක බලශක්ති යටිතල පහසුකම්වලට සුන්බුන් පතිත වීමෙන් බාධා මතුව ඇති බව වාර්තා වේ.

ඉරානය විසින් සෞදි අරාබිය, කුවේට්, ඉරාකය සහ බහරේනය ඉලක්ක කර ගැනීම අඛණ්ඩව සිදුකරන අතර, සෞදි අරාබිය වාර්තා කරන්නේ ගුවන් ආරක්ෂක පද්ධතිය මගින් රියාද් දෙසට දියත් කරන ලද මිසයිල හතරක් ඇතුළුව නැගෙනහිර පළාතේ ඩ්‍රෝන යානා 19ක් විනාශ කර ඇති බවයි.

නැව් ගමනාගමනය ද තර්ජනයට ලක්ව ඇති අතර, එක්සත් රාජධානියේ සමුද්‍ර ආරක්ෂක ඒජන්සිය වාර්තා කළේ හෝර්මුස් සමුද්‍ර සන්ධියට නැගෙනහිරින් පිහිටි යාත්‍රාවකට හඳුනා නොගත් ප්‍රහාරයක් එල්ලවීමෙන් පසු ගිනි ගත් බවයි.