2023 දී වැලිගම W15 හෝටලය අසල සිදු වූ වෙඩි තැබීමේ සිද්ධිය සම්බන්ධයෙන් අවශ්‍යව සිටි සහ විදේශගතව සිට ඇති හිටපු පොලිස් පරීක්ෂක (IP) ජගත් නිශාන්ත ඊයේ ශ්‍රී ලංකාවට පැමිණීමෙන් පසු අත්අඩංගුවට ගත් බව පොලිසිය පවසයි.

2023 දෙසැම්බර් 31 වැනි දින මාතර වැලිගම, පැලෑන ප්‍රදේශයේ W15 හෝටලය ඉදිරිපිට සිදු වූ වෙඩිතැබීමේ සිද්ධිය සම්බන්ධයෙන් හිටපු පොලිස්පති දේශබන්දු තෙන්නකෝන් ඇතුළු කොළඹ අපරාධ කොට්ඨාශයේ (CCD) හිටපු නිලධාරීන් 8 දෙනකු අත්අඩංගුවට ගෙන සැකකරුවන් ලෙස නම්කරන ලෙස මාතර මහේස්ත්‍රාත් අධිකරණය මීට පෙර නියෝග කර තිබිණි.

2023 දෙසැම්බර් 31 වැනි දින, කොළඹ අපරාධ කොට්ඨාශයේ නිලධාරීන් කණ්ඩායමක් මාතර වැලිගම ප්‍රදේශයට ගොස් ඇත්තේ කුප්‍රකට පාතාල චරිතයක් වන නදුන් චින්තක වික්‍රමරත්න නොහොත් ‘හරක් කටා’ සමඟ සම්බන්ධ පුද්ගලයින් පිරිසක් අත්අඩංගුවට ගැනීමේ අරමුණින් යැයි පොලිසිය ප්‍රකාශ කළේය.

පොලිසියට අනුව, වැලිගම W15 හෝටලය තුළ සිට සිවිල් ඇඳුමින් සැරසුණු පිරිසක් එම නිලධාරීන්ට පහරදී ඇති අතර, ඊට ප්‍රතිචාර වශයෙන් ඔවුන් වෙඩිතබා තිබේ.

පසුව, වැලිගම පොලිස් ස්ථානයේ ජංගම මුර සංචාර රථයක් එම ස්ථානයට පැමිණ CCD නිලධාරීන් පැමිණි වෑන් රථයට වෙඩිතබා ඇත.

එහිදී CCD නිලධාරීන් රැගත් වෑන් රථය එම ස්ථානයෙන් පළාගොස් ඇත.

කෙසේවෙතත්, ඒ වන විට, වෑන් රථය ඇතුළත සිටි CCD නිලධාරීන් දෙදෙනෙකුට වෙඩි වැදී තුවාල සිදුවී තිබිණි.

තුවාල ලැබූ නිලධාරීන්ගෙන් එක් අයෙකු වන කොළඹ අපරාධ කොට්ඨාශයේ 47 හැවිරිදි පොලිස් සැරයන් උපුල් චමින්ද කුමාර පසුව වෛද්‍ය ප්‍රතිකාර ලබාගනිමින් සිටියදී මියගියේය.