February 24, 2026
පොලිස් නිලධාරීන් සහ බැංකු නිලධාරීන් ලෙස පෙනීසිටිමින් මහජනතාවට වංචා කළ බවට චෝදනා එල්ල වන කණ්ඩායමක් සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශනයක් ආරම්භ කර තිබේ.
පැමිණිලි කිහිපයක් මත පදනම්ව අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන අංශය විසින් විමර්ශනය සිදුකරන බව පොලිසිය නිවේදනයක් නිකුත් කරමින් කියාසිටියේය.
සැකකරුවන් කිහිපදෙනෙකු අත්අඩංගුවට ගෙන ඇති අතර වැඩිදුර විමර්ශන සිදුවෙමින් පවතී.
මූලික සොයාගැනීම්වලින් පෙනීගොස් ඇත්තේ සැකකරුවන් බැංකු ගිණුම් හිමියන් සහ අනෙකුත් වෘත්තිකයන් ඇතුළු ඉලක්කගත පුද්ගලයන් සම්බන්ධ කරගැනීම සඳහා මෙරට ස්ථාවර දුරකථන අංකවලට සමාන විදේශීය දුරකථන අංක භාවිත කර ඇති බවයි.
ඇමතුම් අතරතුර, වංචාකරුවන් දේශීය බැංකු හෝ මූල්ය ආයතනවල නියෝජිතයන් ලෙස පෙනීසිටිමින් වින්දිතයන්ගේ බැංකු ගිණුම්වලට එරෙහිව පැමිණිලි ගොනුකර ඇති බවට ව්යාජ ප්රකාශ සිදුකර ඇත.
නීතිමය ක්රියාමාර්ග ආරම්භ කිරීමේ මුවාවෙන්, ඇමතුම්කරුවන් ශ්රී ලංකා පොලිස් විමර්ශන ඒකකවල නිලධාරීන් ලෙස පෙනී සිටින සහචරයන්ට ඇමතුම් මාරු කර ඇති බව වාර්තා වේ.
සැකකරුවන් නිල පොලිස් නිල ඇඳුම්වලට සමාන ඇඳුමින් සැරසී WhatsApp වීඩියෝ ඇමතුම් ලබාගත් බව පොලිසිය පැවසීය.
සැකකරුවන් ඇමතුම් අතරතුර පොලිස් පරිසරයක් අනුකරණය කළ බවත්, ව්යාජ ලෙස ප්රශ්න කිරීම් සිදුකළ බවත්, සත්යතාවක් ඇති කිරීම සඳහා ප්රකාශ පටිගත කර ඇති බවත් විමර්ශකයන් සඳහන් කර ඇත.
පසුව, වින්දිතයන්ට ඔවුන්ගේ පෞද්ගලික ගිණුම්වල අරමුදල් සැකකරුවන් විසින් සපයන ලද ගිණුම් වෙත මාරු කරන ලෙස උපදෙස් දී ඇති බව කියනු ලැබේ.
ඒ ඔවුන්ගේ ගිණුම් සත්යාපනය කිරීමට හෝ සුරක්ෂිත කිරීමට එම මාරු කිරීම් අවශ්ය බව පවසමිනි.
වැඩිදුර පරීක්ෂණවලින් හෙළි වූයේ යෝජනා ක්රමය හරහා ලබාගත් අරමුදල් අතරමැදි බැංකු ගිණුම් කිහිපයක් හරහා යවා ඇති අතර පසුව ඒවා Binance ගිණුම් හරහා ගුප්ත ව්යවහාර මුදල් බවට පරිවර්තනය කර ඇති බවයි.
අත්අඩංගුවට ගත් සැකකරුවන් ප්රකාශ කර ඇත්තේ ඔවුන් සමඟ මාර්ගගතව සම්බන්ධ වූ පුද්ගලයන්ගේ උපදෙස් මත අරමුදල් මාරුකර ගනුදෙනු සඳහා පහසුකම් සැලසීම සඳහා කොමිස් මුදල් ලබා ගත් බවයි.
නොදන්නා පුද්ගලයන්ට පෞද්ගලික බැංකු තොරතුරු, ගිණුම් තොරතුරු හෝ මාර්ගගත ගනුදෙනු සඳහාවන රහස්ය අංක හෙළි නොකරන ලෙස පොලිසිය මහජනතාවගෙන් ඉල්ලා සිටී.
මෙවැනි සැක සහිත ඇමතුම් හෝ පණිවිඩ ලැබුණහොත් වහාම ශ්රී ලංකා පොලිසියට දැනුම් දෙන ලෙස මහජනතාවට උපදෙස් දෙනු ලැබේ.
