ශ්‍රී ලංකාව සමඟ පැවැත්වූ දින තුනක රාජ්‍යතාන්ත්‍රික සාකච්ඡා වලින් පසුව, 2026 විස්සයි20 ක්‍රිකට් ලෝක කුසලානය සම්බන්ධයෙන් පාකිස්තානයේ තීරණය වෙනස් වූ බව ශ්‍රී ලංකාවේ පාකිස්තාන මහකොමසාරිස් විශ්‍රාමික මේජර් ජෙනරාල් ෆහීම් උල් අසීස් විදේශ අමාත්‍ය විජිත හේරත්ට දැනුම් දී තිබේ.

ශ්‍රී ලංකා විදේශ අමාත්‍යාංශයේ ප්‍රකාශයකට අනුව, ඉන්දියාවට එරෙහිව 2026 විස්සයි20 ලෝක කුසලාන තරඟයට සහභාගී නොවීමට පාකිස්තානය මීට පෙර තීරණය කර තිබුණද, ශ්‍රී ලංකාවේ ඉල්ලීම පරිදි, අමනාපකම් පසෙකලා තරගයට සහභාගීවීමට දැන් එකඟ වී ඇති බවත්, ගැටලුව විසඳීම සඳහා ශ්‍රී ලංකාවේ මැදිහත්වීම තවදුරටත් අගය කරන බවත් ඔහු පවසා තිබේ.

ශ්‍රී ලංකාවේ සිය ධුර කාලය අවසන් කිරීමට පෙර, මහකොමසාරිස් ෆහීම් උල් අසීස් අද (පෙබරවාරි 10) විදේශ කටයුතු අමාත්‍යාංශයේදී අමාත්‍ය විජිත හේරත් හමුවූ අවස්ථාවේදී මෙම ප්‍රකාශය සිදුකර ඇත.

දින තුනක රාජ්‍යතාන්ත්‍රික සාකච්ඡා සහ දුරකථන සාකච්ඡා අතරතුර මහකොමසාරිස්වරයාගේ ප්‍රතිචාරය සඳහා අමාත්‍ය විජිත හේරත් කෘතඥතාව පළකර ඇත.

විස්සයි20 ලෝක කුසලානය වටා ඇති අවිනිශ්චිතතාවන් කිහිපයක් විසඳීම සඳහා අමාත්‍ය හේරත් අඛණ්ඩව දැරූ රාජ්‍යතාන්ත්‍රික උත්සාහයන් ෆහීම් උල් අසීස් අගය කර තිබේ.

තම ධුර කාලය පිළිබඳව සිහිපත් කරමින් මහකොමසාරිස්වරයා වැඩිදුරටත් පවසා ඇත්තේ, ශ්‍රී ලංකාවේ සේවය කිරීම ප්‍රසන්න හා සාර්ථක කාලපරිච්ඡේදයක් වූ බවත්, විදේශ අමාත්‍යවරයා සහ අමාත්‍යාංශයේ දැඩි සහයෝගය ඊට ලැබුණු බවත්ය.

තම සේවා කාලය තුළ ශ්‍රී ලංකාව 2024 දී සාධාරණ හා ආදර්ශමත් මැතිවරණ දෙකක් පැවැත්වූ බවද ඔහු සඳහන් කර ඇත.