හිටපු අමාත්‍ය කෙහෙළිය රඹුක්වැල්ල සහ තවත් දෙදෙනකුට එරෙහිව අල්ලස් හෝ දූෂණ චෝදනා විමර්ශන කොමිෂන් සභාව විසින් ගොනුකර ඇති නඩුවේ වැඩිදුර විභාගය 2026 මාර්තු 14 වැනි දින කැඳවීමට කොළඹ මහාධිකරණය නියෝග කර තිබේ.

මෙම නඩුව අද (09) කොළඹ මහාධිකරණ විනිසුරු මොහොමඩ් මිහාල් ඉදිරියේ කැඳවූ බව වාර්තා සඳහන් කරයි.

ඉදිරිපත් කරන ලද කරුණු සලකා බැලීමෙන් පසු, නඩුව 2026 මාර්තු 14 වන දින වැඩිදුර විභාගය සඳහා නැවත කැඳවීමට විනිසුරුවරයා නියෝග කර තිබේ.

2015 ජනාධිපතිවරණ සමයේදී ජනමාධ්‍ය අමාත්‍යවරයා ලෙස කටයුතු කළ කාලය තුළ දේශපාලන අරමුණු සඳහා GI පයිප්ප 600 ක් මිලදීගැනීමෙන් ශ්‍රී ලංකා රූපවාහිනී සංස්ථාවට අයත් අරමුදල්වලින් රුපියල් මිලියනයකට ආසන්න මුදලක් පාඩුකළ බවට චෝදනා කරමින් අල්ලස් කොමිසම හිටපු අමාත්‍ය කෙහෙළිය රඹුක්වැල්ල සහ තවත් දෙදෙනෙකුට එරෙහිව නඩුව ගොනුකර තිබේ.

මෙම නඩුවේ නම්කර ඇති විත්තිකරුවන් වන්නේ හිටපු අමාත්‍ය කෙහෙළිය රඹුක්වැල්ල, ශ්‍රී ලංකා රූපවාහිනී සංස්ථාවේ හිටපු සභාපති විමල් රූබසිංහ සහ හිටපු අධ්‍යක්ෂ ජනරාල් චන්ද්‍රපාල ලියනගේය.