සංවේදී හා බරපතළ අපරාධ නඩු සම්බන්ධයෙන් විමර්ශන සඳහා උපදෙස් දීමට නීතිපති පාරින්ද රණසිංහ විසින් අතිරේක සොලිසිටර් ජනරාල් දිලීප පීරිස්ගේ ප්‍රධානත්වයෙන් කමිටුවක් පත් කර ඇත.

පොලිස්පති ප්‍රියන්ත වීරසූරියගේ ඉල්ලීමකට අනුව මෙම කමිටුව පත් කරන ලදී.

නියෝජ්‍ය සොලිසිටර් ජනරාල් ජනක ප්‍රියන්ත බණ්ඩාර, ජ්‍යෙෂ්ඨ රජයේ නීතිඥ ජයන්ති වෑගොඩපොල සහ රජයේ නීතිඥ ශක්ති ජාගොඩආරච්චි යන අය කමිටුවේ අනෙකුත් සාමාජිකයන් වේ.

දැනට විමර්ශනය වෙමින් පවතින බරපතළ අපරාධ නඩු ගොනු කිරීමේදී නීතිමය අඩුපාඩු සිදු නොවන බවට කමිටුව සහතික කරනු ඇත.

විමර්ශනයක් අතරතුර මතු විය හැකි ඕනෑම ගැටළුවක් විසඳීමට අවශ්‍ය හදිසි උපදෙස් කමිටුව විසින් ලබා දෙනු ඇති බව නීතිපති දෙපාර්තමේන්තු ආරංචි මාර්ග පැවසීය.