දූත පිරිසක් සමග ඉන්දියාවේ සංචාරයක නිරත ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා සහ ඉන්දීය විදේශ කටයුතු අමාත්‍ය එස්. ජයිශංකර් අතර හමුවක් නවදිල්ලියේදී පැවැත්විණි.

ද්විපාර්ශ්වික සබඳතා තවදුරටත් ශක්තිමත් කිරීම, වර්ධන අවස්ථා ගවේෂණය කිරීම සහ දෙරට අතර සමාජ සුභසාධන වැඩසටහන් ඉදිරියට ගෙන යෑම පිළිබඳ එහිදී සාකච්ඡා කර තිබේ.

මෙම රැස්වීමේදී, අමාත්‍ය ජයිශංකර් ශ්‍රී ලංකාවට ඉන්දියාව අඛණ්ඩව සහයෝගය දක්වන බව නැවත තහවුරු කර ඇත.

මෑත කාලීන ආර්ථික අර්බුදයේදී මෙන්ම දිට්වා සුළි කුණාටුවෙන් පසුව ලබා දුන් සහාය ද ඔහු සිහිපත් කර තිබිණි.

ඉන්දියාව ශ්‍රී ලංකාව සඳහා විශ්වාසදායක හවුල්කරුවකු ලෙස අඛණ්ඩව කටයුතු කරන බව ඔහු අවධාරණය කර තිබේ.

X හි සටහනක, ජයිශංකර් සඳහන් කර තිබුණේ මෙම සාකච්ඡාව හිතවත් අන්තර්ක්‍රියාවක් බවයි.

ඉන්දියාව අභියෝගාත්මක කාලවලදී ශ්‍රී ලංකාව සමඟ සිට ඇති බවත් අනාගතයේදී එය අඛණ්ඩව සිදු කරන බවත් ඔහු සඳහන් කර තිබේ.