විශ්‍රාම ගිය රජයේ ඉහළ නිලධාරීන් සඳහා හිමිව ඇති සහනදායී වාහන බලපත්‍ර යටතේ මෝටර් රථ ආනයනයට අවසර දීම පිළිබඳ රජය සාකච්ඡා කරමින් සිටින බව ආර්ථික සංවර්ධන නියෝජ්‍ය අමාත්‍ය නිශාන්ත ජයවීර ඊයේ(3) පාර්ලිමේන්තුවට පැවසීය.

පාර්ලිමේන්තු මන්ත්‍රී දයාසිරි ජයසේකර විසින් මතු කරන ලද ප්‍රශ්නයකට පිළිතුරු දෙමින් නියෝජ්‍ය අමාත්‍යවරයා පැවසුවේ රජයේ විශ්‍රාමික ජ්‍යෙෂ්ඨ නිලධාරීන්ට වාහන බලපත්‍ර නිකුත් කිරීමේ යෝජනා ක්‍රමය ක්‍රියාත්මක වන අතර එය අත්හිටුවා නොමැති බවයි.

2025 දී ලබා දුන් බලපත්‍ර 563ක් ඇතුළුව මේ දක්වා මෙම යෝජනා ක්‍රමය යටතේ බලපත්‍ර 1,900ක් නිකුත් කර ඇති බව ඔහු පැවසීය.

වලංගු බලපත්‍ර දරන ජ්‍යෙෂ්ඨ විශ්‍රාමික නිලධාරීන් සඳහා අවම වශයෙන් ප්‍රමුඛතා පදනමක් මත වාහන ආනයනයට අවසර දෙන ලෙස මන්ත්‍රී ජයසේකර රජයෙන් ඉල්ලා සිටියේය.

ඊට ප්‍රතිචාර දක්වමින් නියෝජ්‍ය අමාත්‍ය ජයවීර පැවසුවේ මෙම යෝජනා ක්‍රමය යටතේ දැනටමත් බලපත්‍ර නිකුත් කර ඇති සුදුසුකම් ලත් විශ්‍රාමික නිලධාරීන් සඳහා වාහන ආනයනයට පහසුකම් සැලසීම පිළිබඳ සාකච්ඡා සිදුවෙමින් පවතින බවයි.