හෝටල් සහ ආහාර සේවා කර්මාන්තවල රාත්‍රී සේවය සඳහා වයස අවුරුදු 18ට වැඩි කාන්තාවන් සේවයේ යෙදවීමට අවසර දෙමින් විශේෂ ගැසට් නිවේදනයක් නිකුත් කර ඇත.

මෙම පියවර ඔවුන්ගේ ආරක්ෂාව, සෞඛ්‍යය සහ සුභසාධනය ආරක්ෂා කිරීම සඳහා දැඩි කොන්දේසිවලට යටත් වේ.

ජනවාරි 30 වැනි දින නිකුත් කරන ලද මෙම අතිවිශේෂ ගැසට් නිවේදනය, සාප්පු සහ කාර්යාල සේවක (රැකියා සහ වේතන නියාමනය) පනත යටතේ පවතින රෙගුලාසි සංශෝධනය කරමින්, රාත්‍රී කාලය තුළ කාන්තා සේවිකාවන් සේවයේ යෙදවීමේ විෂය පථය පුළුල් කරයි.

නව රෙගුලාසි යටතේ, ආගන්තුක සත්කාර, ආහාර පාන සේවා සහ අදාළ ආයතන ඇතුළු අංශවල වයස අවුරුදු 18 සහ ඊට වැඩි කාන්තාවන් සවස 6.00 සිට පසුදා උදෑසන 6.00 දක්වා සේවයේ යෙදවිය හැකිය.

කෙසේවෙතත්, ගැසට් නිවේදනය මගින් සේවා යෝජකයන් මත පැහැදිලි වගකීම් පවරන අතර, මෙම විධිවිධාන යටතේ රාත්‍රී සේවයේ යෙදීසිටින කාන්තාවන්ගේ සෞඛ්‍ය සේවා, ආරක්ෂාව සහ සුභසාධනය සඳහා ඔවුන් සම්පූර්ණයෙන්ම වගකිව යුතු බව සඳහන් කරයි.

සේවායෝජකයන් විසින් සේවා මුරයක් අවසානයේ සිට උදෑසන 6.00 දක්වා සුදුසු නවාතැන් පහසුකම් සැපයීම සහතික කළ යුතු අතර, නැතහොත්, සවස 6.00 සිට පසුදා උදෑසන 6.00 දක්වා වැඩ මුරය අවසන් වන විට සේවකයාගේ සුපුරුදු පදිංචි ස්ථානයට ආරක්ෂිත ප්‍රවාහන පහසුකම් සැලසිය යුතුය.

රාත්‍රී කාලයේ ආරක්ෂාව ඇතුළුව කාන්තා සේවිකාවන් සඳහා ආරක්ෂිත වැඩ පරිසරයක් නිර්මාණය කිරීම සඳහා අවශ්‍ය පියවර ගත යුතු බව රෙගුලාසි තවදුරටත් අවධාරණය කරයි.

පනතේ 66 වැනි වගන්තිය යටතේ සංශෝධන සිදුකර ඇති අතර, එය කම්කරු අමාත්‍ය ආචාර්ය අනිල් ජයන්ත ප්‍රනාන්දු විසින් නිකුත් කර තිබේ.

රාත්‍රී කාලයේ රැකියාවල නියුතු කාන්තාවන් සඳහා ආරක්ෂක විධිවිධාන පවත්වා ගනිමින් කම්කරු රෙගුලාසි පරිණාමය වන කර්මාන්ත අවශ්‍යතා සමඟ පෙළගැස්වීම නව විධිවිධානවල අරමුණයි.