February 1, 2026
දිගු කලක් පුරප්පාඩු වී තිබූ විගණකාධිපති ධුරය ඉදිරි දින තුන ඇතුළත පුරවන බව කැබිනට් ප්රකාශකඅමාත්ය වෛද්ය නලින්ද ජයතිස්ස ප්රකාශ කර තිබේ.
විපක්ෂය, මහජන සහ සිවිල් සංවිධාන සහ ආගමික නායකයන්ගේ බලපෑම් නොතකා විගණකාධිපතිවරයා පත් කිරීම මාස ගණනාවක් තිස්සේ ඇනහිට තිබුණේ මන්දැයි පුවත්පතක් යොමුකර තිබූ ප්රශ්නයකට ප්රතිචාර වශයෙන් ඔහු මේ බව පවසා ඇත.
අලුතින් පත් කරන ලද ආණ්ඩුක්රම ව්යවස්ථා සභාවේ ඊළඟට පැවැත්වෙන දෙවැනි රැස්වීමේදී විගණකාධිපතිවරයා පත්කිරීම පිළිබඳ තීරණය කරනු ඇතැයි ඔහු පැවසීය.
අලුතින් පත් කරන ලද සිවිල් සමාජ නියෝජිතයන් සමග එහි පළමු රැස්වීම ජනවාරි 29 වැනිදා පැවැත්විණි.
ඊළඟ රැස්වීමේදී මෙම කාරණය නැවත සළකා බලන බව පවසමින් විගණකාධිපති ධුරය පිළිබඳ අවසන් තීරණයක් ගැනීම ඔවුන් කල් දැමූ බව පාර්ලිමේන්තු ආරංචි මාර්ග පැවසීය.
නාමිකයා වෘත්තීය හා ව්යවස්ථාමය ප්රමිතීන් සපුරාලන බවත් ඉහළම මට්ටමින් මහජන මූල්ය අධීක්ෂණය සිදු කළ හැකි බවත් සහතික කිරීම සඳහා පාර්ලිමේන්තු හා ව්යවස්ථාමය පාර්ශ්වකරුවන් සමඟ සාකච්ඡා සිදුවෙමින් පවතින බව ආරංචි මාර්ග පැවසීය.
පෙර විගණකාධිපති ඩබ්ලිව්.පී.සී. වික්රමරත්න විශ්රාම ගැනීමෙන් පසු විගණකාධිපති ධුරය 2025 අප්රේල් මාසයේ සිට හිස්ව පවතී.
ඔහුගේ ඉවත්වීම සමග ආණ්ඩුක්රම ව්යවස්ථාවේ 153 වැනි වගන්තිය යටතේ පත්වීම් ක්රියාවලිය ආරම්භ කළ අතර, ආණ්ඩුක්රම ව්යවස්ථා සභාවේ අනුමැතියට යටත්ව ජනාධිපතිවරයාට විගණකාධිපතිවරයෙකු පත් කිරීමට අවශ්ය විය.
ජනාධිපති අනුර කුමාර දිසානායක විසින් යෝජනා කරන ලද අපේක්ෂකයන් කිහිප දෙනෙකු ආණ්ඩුක්රම ව්යවස්ථා සභාව නැවත නැවතත් ප්රතික්ෂේප කර තිබිණි.
විගණකාධිපතිවරයාගේ පත්වීම පසුගිය වසරේ මැයි මාසයේ සිට මතභේදයට තුඩු දී තිබේ.
ජනාධිපති දිසානායක ප්රථම වරට ලංකා ඛනිජ තෙල් සංස්ථාවේ එච්.ටී.පී. චන්දන නම් කළ නමුත්, අත්දැකීම් සහ විභව ගැටුම් පිළිබඳ සැළකිලිමත් වීම හේතුවෙන් ආණ්ඩුක්රම ව්යවස්ථා සභාව නාමයෝජනාව ප්රතික්ෂේප කළේය.
ධර්මපාල ගම්මන්පිල සහ එල්.එස්.පී. ජයරත්න යන අයගේ වැඩබලන පත්වීම් ද කවුන්සිලය විසින් අවහිර කරන ලද අතර, එමඟින් මාස ගණනාවක් විගණන ආයතනයේ තාවකාලික ප්රධානියකු පවා නොමැති තත්ත්වයක් උද්ගත විය.
නීති ක්ෂේත්රයේ ප්රවීණයන් පවසන පරිදි මෙය 1978 ආණ්ඩුක්රම ව්යවස්ථාවෙන් පසු පෙර නොවූ විරූ තත්ත්වයකි.
සේවයේ නියුතු හමුදා නිලධාරියකු වන ඕ.ආර්. රාජසිංහගේ නාමයෝජනා කවුන්සිලය ප්රතික්ෂේප කළ විට අවහිරය තවත් ගැඹුරු විය.
