කොළඹ මහ නගර සභාවේ වසර 15ක කාලයක් තුළ සිදු වූ බව කියන දූෂණ, වංචා සහ බලය අයුතු ලෙස භාවිත කිරීම සම්බන්ධයෙන් සෙවීමේ ජනාධිපති විමර්ශන කොමිසම මහජන පැමිණිලි සහ තොරතුරු කැඳවීම ආරම්භ කර තිබේ.

2010 සහ 2025 අතර කාලය තුළ සිදු වූ බව කියන වැරදි ක්‍රියාවන්, දූෂණ, වංචා, සාපරාධී විශ්වාසය කඩ කිරීම, රාජ්‍ය සම්පත් සහ වරප්‍රසාද අනිසි ලෙස භාවිත කිරීම, නීති විරෝධී බඳවා ගැනීම් සහ පත්වීම්, ප්‍රසම්පාදන උල්ලංඝනය කිරීම් සහ චංචල සහ නිශ්චල දේපළ බදු දීමේදී සිදුවන අක්‍රමිකතා ඇතුළු සිදුවීම් සම්න්බන්ධයෙන් කොමිසම විමර්ශනය කරනු ඇත.

ස්ථාපිත ක්‍රියාපටිපාටිවලින් පිටත සිදුකරන ලද නීතිමය ක්‍රියාමාර්ග සහ බේරුම් කිරීම් ද කොමිසම පරීක්ෂා කරන අතර රාජ්‍ය වත්කම් සහ ආදායමට සිදු වූ පාඩු තක්සේරු කරනු ඇත.

2025 දෙසැම්බර් 30 වැනිදා නිකුත් කරන ලද අතිවිශේෂ ගැසට් නිවේදනය මගින් 1948 විමර්ශන කොමිෂන් සභා පනත යටතේ ජනාධිපති අනුර කුමාර දිසානායක විසින් කොමිසම පත් කරන ලදී.

ජනාධිපති මාධ්‍ය අංශයට අනුව, කොමිසම අංක 152, ගාලු පාර, කොළඹ 03 ස්ථානයේ පිහිටා ඇත.

හිටපු මහාධිකරණ විනිසුරු පියසේන රණසිංහ කොමිසමේ සභාපතිත්වය දරයි.

එහි සාමාජිකයන් අතරට ශ්‍රී ලංකා ගණකාධිකාරී සේවයේ ඊ.ආර්.එම්.එස්.එච්. ඒකනායක සහ විශ්‍රාමික ජ්‍යෙෂ්ඨ පොලිස් අධිකාරී ඩී.එස්. වික්‍රමසිංහ ඇතුළත් වේ.

වත්මන් සහ හිටපු දේශපාලන නිලධාරීන්, රාජ්‍ය සේවකයන්, ව්‍යවස්ථාපිත ආයතනවල නිලධාරීන්, සේවා සපයන්නන් සහ රාජ්‍ය හෝ පෞද්ගලික ආයතන හෝ පුද්ගලයන්ට එරෙහි බරපතළ චෝදනා පිළිබඳ පැමිණිලි සහ තොරතුරු ලබා ගැනීමට කොමිසමට බලය ඇත.

බරපතළ යැයි සැළකෙන්නේ නම්, නිශ්චිත කාල සීමාවෙන් පිටත පැමිණිලි ද සළකා බැලිය හැකිය.

කොමිසම කඩිනම්, අපක්ෂපාතී සහ පුළුල් පරීක්ෂණ පවත්වන අතර වගකිවයුතු පුද්ගලයන්ට හෝ ආයතනවලට එරෙහිව නීතිමය හෝ පරිපාලන ක්‍රියාමාර්ග සඳහා නිර්දේශ ඉදිරිපත් කරනු ඇත.

අනාගතයේදී මෙවැනිම විෂමාචාර වැළැක්වීම සඳහා පියවර ද කොමිසම විසින් යෝජනා කරනු ඇත.

කොමිසම මාස තුනක් ඇතුළත අතුරු වාර්තාවක් මෙන්ම සොයාගැනීම් සහ නිර්දේශ සහිත අවසන් වාර්තාව මාස හයක් ඇතුළත ජනාධිපති ලේකම් වෙත ඉදිරිපත් කිරීමට අපේක්ෂා කෙරේ.

මහජනතාවට, සංවිධානවලට සහ ආයතනවලට සිංහල, දෙමළ හෝ ඉංග්‍රීසි භාෂාවෙන් ලිඛිත පැමිණිලි කොමිෂන් සභාවේ ලේකම් වෙත ඉදිරිපත් කළ හැකිය.

සියලුම පැමිණිලි 2026 පෙබරවාරි 23 වැනිදා හෝ ඊට පෙර ලැබිය යුතුය.

පැමිණිලිවල පැමිණිලිකරුගේ නම, ලිපිනය, සම්බන්ධතා දුරකථන අංකය සහ ජාතික හැඳුනුම්පත හෝ විදේශ ගමන් බලපත්‍ර අංකය ඇතුළත් විය යුතුය.

තම අනන්‍යතාව රහසිගතව තබා ගැනීමට කැමති පැමිණිලිකරුවන්ට නිර්නාමිකව සිටීමට ඉල්ලා සිටිය හැකිය.

වාචික ඉදිරිපත් කිරීම් කිරීමට කැමති පිරිසට පෙබරවාරි 23 වැනිදා හෝ ඊට පෙර හමුවීමක් වෙන්කරවා ගැනීම සඳහා 011-230-1735 අංකයෙන් කොමිසම ඇමතිය යුතු වේ.