පාර්ලිමේන්තු විශ්‍රාම වැටුප් අහෝසි කිරීම සඳහා පාර්ලිමේන්තුවට ඉදිරිපත් කරන ලද පනත් කෙටුම්පත අභියෝගයට ලක්කරමින් ගොනු කරන ලද පෙත්සම් සමාලෝචනය කිරීම ශ්‍රේෂ්ඨාධිකරණය විසින් අවසන් කර තිබේ.

ඒ අනුව, ශ්‍රේෂ්ඨාධිකරණය නිවේදනය කර ඇත්තේ තම තීරණය නියමිත වේලාවට කථානායකවරයාට විධිමත් ලෙස දැනුම්දෙන බවයි.

හිටපු පාර්ලිමේන්තු මන්ත්‍රීවරුන් පිරිසක් විසින් පෙත්සම් ඉදිරිපත් කර තිබිණි.

පාර්ලිමේන්තු විශ්‍රාම වැටුප් (අවලංගු කිරීමේ) පනත් කෙටුම්පතේ වගන්ති කිහිපයක් ආණ්ඩුක්‍රම ව්‍යවස්ථාවට අනුකූල නොවන බවට තීරණයක් ඉල්ලා ශ්‍රේෂ්ඨාධිකරණය හමුවේ මෙම පෙත්සම් ගොනුකර ඇත.

යෝජිත පනත් කෙටුම්පතේ ඇතැම් විධිවිධාන ආණ්ඩුක්‍රම ව්‍යවස්ථාව යටතේ සහතික කර ඇති මූලික අයිතිවාසිකම් උල්ලංඝනය කරන බව පෙත්සම්කරුවෝ කියා සිටියහ.

ඒ අනුව, පනත් කෙටුම්පත බලාත්මක කිරීමට නම්, එය පාර්ලිමේන්තුවේ විශේෂ බහුතරයකින් සම්මත කර මහජන ජනමත විචාරණයකින් අනුමත කළ යුතු බවට තීන්දුවක් ලබාදෙන ලෙස පෙත්සම්කරුවෝ ශ්‍රේෂ්ඨාධිකරණයෙන් ඉල්ලා සිටියහ.

පාර්ලිමේන්තු මන්ත්‍රීවරුන්ගේ විශ්‍රාම වැටුප් අහෝසි කිරීමේ පනත් කෙටුම්පත අධිකරණ හා ජාතික ඒකාබද්ධතා අමාත්‍ය ආචාර්ය හර්ෂණ නානායක්කාර විසින් ජනවාරි 7 වැනිදා පාර්ලිමේන්තුවට ඉදිරිපත් කරන ලදී.

පනත් කෙටුම්පතට අභියෝග කරන පෙත්සම් ඉදිරිපත් කිරීම සඳහා එදින සිට දින 14ක කාලයක් ලබා දී තිබිණි.

පනත් කෙටුම්පත පිළිබඳ දෙවැනි වර කියවීමේ විවාදය ලබන මස අගදී පැවැත්වීමට නියමිතය.

පනත් කෙටුම්පත බලාත්මක වූ පසු, හිටපු පාර්ලිමේන්තු මන්ත්‍රීවරුන් 512 දෙනෙකුගේ විශ්‍රාම වැටුප් හිමිකම් අහෝසි කරනු ලැබේ.