එක්සත් ජනපද ජනාධිපති ඩොනල්ඩ් ට්‍රම්ප් යුරෝපීය රටවල් කිහිපයකට අමතර තීරුබදු පැනවීමට සැලසුම් කර ඇති බව නිවේදනය කර තිබේ.

ඔහු එම පියවර හඳුන්වා ඇත්තේ ග්‍රීන්ලන්තය වටා ඇති ගෝලීය ආරක්ෂක ගැටළුවලට මෙය සම්බන්ධ කරමිනි.

ට්‍රම්ප් සිය Truth සමාජ මාධ්‍ය වේදිකාවේ සටහනක සඳහන් කළේ ඩෙන්මාර්කය, නෝර්වේ, ස්වීඩනය, ප්‍රංශය, ජර්මනිය, එක්සත් රාජධානිය, නෙදර්ලන්තය සහ ෆින්ලන්තය ඇතුළු රටවල් එක්සත් ජනපදයට අපනයනය කරන භාණ්ඩ සඳහා නව තීරුබදු පැනවෙන බවයි.

ප්‍රකාශයට අනුව, 2026 පෙබරවාරි 1 වැනිදා සිට ලැයිස්තුගත රටවල සියලුම භාණ්ඩ සඳහා සියයට 10ක තීරුබදුවක් පනවනු ලැබේ.

2026 ජුනි 1 වැනිදා සිට තීරුබදු සියයට 25 දක්වා වැඩි කරන බව ට්‍රම්ප් පැවසීය.

ග්‍රීන්ලන්තය සම්පූර්ණයෙන් මිලදී ගැනීම සඳහා ගිවිසුමකට එළඹෙන තෙක් තීරුබදු ක්‍රියාත්මක වන බව ට්‍රම්ප් පැවසීය.

තම තර්කය පැහැදිලි කරමින් ට්‍රම්ප් සඳහන් කර තිබුණේ ‘ග්‍රීන්ලන්තය ආපසු භාර දීමට ඩෙන්මාර්කයට කාලය පැමිණ ඇති’ බවයි.

ලෝක සාමය අනතුරේ පවතින බව ද ඔහු කියා සිටියේය.

චීනය සහ රුසියාවට ද ‘ග්‍රීන්ලන්තය අවශ්‍යව’ ඇති බවට චෝදනා කළ ට්‍රම්ප් තත්ත්වය කළමනාකරණය කිරීමට හැකියාව ඇත්තේ එක්සත් ජනපදයට පමණක් බවට තර්ක කළේය.

“මෙය අපගේ ලෝකයේ සුරක්ෂිත බව, ආරක්ෂාව සහ පැවැත්ම සඳහා ඉතා භයානක තත්වයක්,” යනුවෙන් ට්‍රම්ප් ලිවීය.

නම් කරන ලද යුරෝපීය රටවල් ගෝලීය ආරක්ෂාව පිළිගත නොහැකි අවදානමකට ලක් කරන බවට ද ඔහු චෝදනා කළේය.

‘ගෝලීය සාමය සහ ආරක්ෂාව ආරක්ෂා කිරීම’ සඳහා යෝජිත පියවර අවශ්‍ය බව ඔහු පැවසුවේ ග්‍රීන්ලන්තය ඇතුළත් කළහොත් පමණක් උපරිම කාර්යක්ෂමතාවයෙන් ක්‍රියාත්මක විය හැකි බව පවසමිනි.

ට්‍රම්ප්ගේ සටහනේ නම් කර ඇති රටවල රජයන්ගෙන් මේ සඳහා ක්ෂණික ප්‍රතිචාරයක් නොලැබිණි.