කෘමි නිදර්ශක, රසායනික ද්‍රව්‍ය සහ කුඩා සතුන් අල්ලා ගැනීමට භාවිත කරන උපකරණ සමග විදේශීය ජාතිකයන් දෙදෙනෙකු හෝර්ටන් තැන්න ජාතික වනෝද්‍යානයේ නිලධාරීන් විසින් අත්අඩංගුවට ගෙන තිබේ.

ලෝකාන්තයේ මංපෙතට පිවිසෙන ස්ථානයේ සාමාන්‍ය පරීක්ෂාවන් අතරතුර, උද්‍යාන නිලධාරීන් එක් සංචාරකයකුගේ ගමන් මලුවල තිබී සැක සහිත අයිතම සොයා ගැනීමත් සමග මෙම අත්අඩංගුවට ගැනීම් සිදුකරන ලදී.

උද්‍යාන පාලක එම්.එම්.කේ. මොරතැන්නගේ උපදෙස් මත හක්ගල වනජීවී කාර්යාලයේ ආරක්ෂකයකු ද සමඟ වනෝද්‍යාන නිලධාරීන් සැකකරුවන් නවාතැන් ගෙන සිටි නුවරඑළියේ නවාතැනක් පසුව පරීක්ෂා කිරීමෙන් අමතර නිදර්ශක සහ රසායනික ද්‍රව්‍ය සොයාගෙන තිබේ.

සැකකරුවන් ඊයේ (12) නුවරඑළිය මහේස්ත්‍රාත් අධිකරණයට ඉදිරිපත් කෙරුණු අතර ඔවුන්ගේ විදේශ ගමන් බලපත්‍ර අධිකරණ භාරයට ගෙන, සංචාරක තහනමක් පනවා, එක් අයකුට රුපියල් මිලියනය බැගින් වූ ඇප මත නිදහස් කරන ලදී.

නඩුව ජනවාරි 26 වැනිදා නඩුව නැවත විභාග කිරීමට නියමිතය.