නොරොච්චෝලේ බලාගාරයට ගල්අඟුරු සැපයීමට අදාළ ටෙන්ඩරය ප්‍රදානය කිරීමේදී බරපතල වංචාවක් පවතින බව සඳහන් කරමින්, පෙරටුගාමී සමාජවාදී පක්ෂය ඊයේ ජනාධිපති අනුර කුමාර දිසානායකගෙන් ඉල්ලා සිටියේ ඒ පිළිබඳව පරීක්ෂණයක් පවත්වන ලෙසයි.

ට්‍රයිඩන්ට් චෙම්ෆාර් සමාගමට නිල ගල්අඟුරු සැපයුම්කරුවෙකු ලෙස ලියාපදිංචි වීමට හැකිවන පරිදි බලාගාරයට ගල්අඟුරු සැපයීම සඳහා ටෙන්ඩර් කැඳවීම 2025 දී ප්‍රමාද කර ඇති බව පෙරටුගාමී සමාජවාදී පක්ෂයේ ලේකම් පුබුදු ජයගොඩ ජනමාධ්‍ය වෙත පැවසීය.

සෑම වසරකම පෙබරවාරි මාසය වන විට ගල්අඟුරු සැපයීම සඳහා ටෙන්ඩර් අවසන් කිරීම සාමාන්‍ය පිළිවෙත වී තිබේ.

එසේම, ගල්අඟුරු සැපයීමේ අත්දැකීම් පිළිබඳ සම්මත නිර්ණායක මෙම සමාගම විසින් සපුරා නොමැති බවට චෝදනා එල්ල වේ.

සමාගමේ හිමිකරුට ඉන්දියාවේ මුදල් විශුද්ධිකරණයට සම්බන්ධ බවට චෝදනා එල්ල වී තිබෙන බවට පෙරටුගාමී සමාජවාදී පක්ෂය පවසයි.

මෙම තත්වය යටතේ ගල්අඟුරු බලශක්ති සැපයුම් ටෙන්ඩරය ප්‍රදානය කිරීම සම්බන්ධයෙන් පරීක්ෂණයක් පවත්වන ලෙස පෙරටුගාමී සමාජවාදී පක්ෂය ජනාධිපතිවරයාගෙන් ඉල්ලා සිටී.