නුගේගොඩ කොට්ඨාශයේ අපරාධ විමර්ශන අංශය විසින් ත්‍රිරෝද රථ සොරකම්වලට සම්බන්ධ සැකකරුවන් තිදෙනෙකු අත්අඩංගුවට ගෙන ඇත.

2025 දෙසැම්බර් 28 වැනි දින මිරිහාන පොලිස් ස්ථානයට වාර්තා වූ ත්‍රිරෝද රථ සොරකමක් සම්බන්ධයෙන් සිදුකරන ලද පරීක්ෂණවලින් පසුව, 2026 ජනවාරි 10 වැනි දින සැකකරුවන් දෙදෙනෙකු අත්අඩංගුවට ගෙන තිබේ.

පසුව කරන ලද පරීක්ෂණවලින් 2026 ජනවාරි 11 වැනි දින තවත් සැකකරුවකු අත්අඩංගුවට ගැනීමට හැකිවී අතර, ප්‍රශ්න කිරීමේදී හෙළි වූ තොරතුරු මත පදනම්ව, සොරකම් කරන ලද ත්‍රිරෝද රථය කුරුවිට ප්‍රදේශයේදී සොයාගෙන ඇත.

වැඩිදුර පරීක්ෂණවලදී යටියන්තොට, බලංගොඩ, බදුල්ල සහ බත්තරමුල්ල යන ප්‍රදේශවලින් සොරකම් කරන ලද තවත් ත්‍රිරෝද රථ 10 ක් පිළිබඳව තොරතුරු අනාවරණය වී ඇත.

වයස අවුරුදු 30, 32 සහ 46 ක් වන සැකකරුවන් කැලණිය, අම්බලන්තොට සහ පරකඩුව යන ප්‍රදේශවල පදිංචිකරුවන් වේ.

සැකකරුවන් සොරකම් කරන ලද වාහනවල වර්ණය, චැසි අංක සහ එන්ජින් අංක වෙනස් කර, ව්‍යාජ අංක තහඩු සකස් කර, ඒවා විකිණීම සඳහා ව්‍යාජ ලේඛන සකස් කර ඇති බව පොලිසිය අනාවරණය කරයි.

නුගේගොඩ කොට්ඨාශයේ අපරාධ විමර්ශන අංශය වැඩිදුර පරීක්ෂණ දිගටම කරගෙන යයි.