හිටපු අමාත්‍ය අනුර ප්‍රියදර්ශන යාපා ඇතුළු හත්දෙනකුට එරෙහිව ගොනුකර ඇති නඩුව ජනවාරි 27 වැනි දින විභාගයට ගැනීමට කොළඹ මහාධිකරණය නියෝග කර ඇති බව වාර්තා වේ.

2014 දී බිංගිරිය සහ නාරම්මල ප්‍රදේශවල ගංවතුරෙන් අවතැන් වූ ජනතාවට සහන සැලසීමේ මුවාවෙන් ලංකා ඛනිජ තෙල් සංස්ථාවට අයත් රුපියල් මිලියන 6.1 කට අධික අරමුදල් අවභාවිත කිරීම සහ 2015 දී ජනාධිපතිවරණ ප්‍රචාරක කටයුතු සඳහා එම අරමුදල් භාවිත කිරීම යන චෝදනා මත මෙම නඩුව පවරා ඇත.

මෙම නඩුව අද කොළඹ මහාධිකරණ විනිසුරු උදේෂ් රණතුංග ඉදිරියේ කැඳවනු ලැබූ අතර, ඉදිරිපත් කරන ලද කරුණු සලකා බැලීමෙන් පසු ජනවාරි 27 වැනි දින නඩු විභාගය ආරම්භ කරන ලෙස ඔහු නියෝග කළේය.

එදින අධිකරණය හමුවේ පෙනීසිටින ලෙස සාක්ෂිකරුවන් දෙදෙනකුට සිතාසි නිකුත් කරන ලෙස මහාධිකරණ විනිසුරුවරයා තවදුරටත් නියෝග කළේය.

නීතිපතිවරයා විසින් ගොනුකරන ලද අධිචෝදනා පත්‍රයට අනුව, විත්තිකරු නීතිවිරෝධී ලෙස ඛනිජ තෙල් නීතිගත සංස්ථාවට අයත් රුපියල් මිලියන 6.1 ක වත්කම් අවභාවිත කර ඇති බව සඳහන් වේ.

රජයේ අරමුදල් වැරදි ලෙස භාවිත කළ බවට චෝදනා කරමින් එවකට ඛනිජ තෙල් කර්මාන්ත අමාත්‍යවරයා ලෙස කටයුතු කළ අනුර ප්‍රියදර්ශන යාපා, ඔහුගේ බිරිඳ සහ තවත් විත්තිකරුවන් හයදෙනෙකුට එරෙහිව නීතිපතිවරයා චෝදනා පහක් ගොනුකර තිබේ.