ආණමඩුව ප්‍රාදේශීය සභාවේ සභාපතිවරයා සහ උප සභාපතිවරයා පත්කිරීම සඳහා පැවති ඡන්ද විමසීමේදී ජාතික ජන බලවේගයට එම තනතුරු දෙකම හිමිව තිබේ.

වාර්තාවන්ට අනුව, ජාතික ජන බලවේගය නියෝජනය කරන ආලෝක බණ්ඩාර වැඩි ඡන්ද හතරක් හිමිකර ගනිමින් සභාපති ධුරයට තේරීපත්ව තිබේ.

වයඹ පළාත් කොමසාරිස් සංජීවනී හේරත් විසින් කැඳවන ලද සභා සැසිවාරයේදී මෙම ඡන්ද විමසීම් සිදුකර ඇත.

පසුගිය වසරේ පැවැති පළාත් පාලන ඡන්ද විමසීමෙන් අනතුරුව ආණමඩුව ප්‍රාදේශීය සභාව සඳහා සභාපතිවරයෙකු පත් කිරීම වෙනුවෙන් පළාත් කොමසාරිස්වරයා සහ නිලධාරීහු දෙවරක් ඡන්දයක් පැවැත්වීමට උත්සාහ කළහ.

කෙසේවෙතත්, සමගි ජන බලවේගය ඇතුළු විපක්ෂය රහස් ඡන්දයකට විරෝධය පළකරමින් සැසිවාර වර්ජනය කළ අතර, එහි ප්‍රතිඵලයක් ලෙස ගණපූරණය නොමැතිවීම හමුවේ ඡන්දය කල්දැමීමට සිදුවිය.

පළාත් කොමසාරිස්වරයාට ලබාදුන් අවස්ථා දෙක අහෝසි වූ බැවින්, නීතිපතිවරයාගේ උපදෙස් සඳහා ගැටලුව මැතිවරණ කොමිසමට යොමුකරන ලදී.

එම මඟපෙන්වීම මත පදනම්ව, මැතිවරණ කොමිසම සභාව නැවත රැස්කිරීමට වයඹ පළාත් කොමසාරිස්වරයාට බලය පවරා තිබිණි.