December 31, 2025
වසර තුනකට වැඩි කාලයක් ඩුබායි හි අතරමංව සිටින ශ්රී ලාංකික කාන්තාවක් සහ ඇගේ දරුවා පිළිබඳ සමාජ මාධ්ය ජාල ඔස්සේ පළ වූ උපකාර ඉල්ලා සිටීමේ ඉල්ලීමක් සම්බන්ධයෙන් ශ්රී ලංකා විදේශ කටයුතු අමාත්යාංශය පරීක්ෂණයක් ආරම්භ කර තිබේ.
විදේශ කටයුතු නියෝජ්ය අමාත්ය අරුන් හේමචන්ද්ර සඳහන් කළේ, එම කාන්තාව ෆේස්බුක් ඔස්සේ වීඩියෝවක් පළකර තමාව ගෙන්වා ගැනීම සඳහා ජනාධිපතිවරයා සහ විදේශ අමාත්යවරයා වෙත සෘජුවම ඉල්ලීමක් කිරීමෙන් පසුව විධිමත් පරීක්ෂණයක් ආරම්භ කර ඇති බවයි.
හෘදයාබාධයක් හේතුවෙන් දීර්ඝ කාලයක් රෝහල්ගත කිරීමෙන් පසු තම සැමියා මියගිය දා සිට එක්සත් අරාබි එමීර් රාජ්යයෙන් පිටව යෑමට නොහැකිව සිටින බව ඇය එම සටහනේ සඳහන් කර ඇත.
නොගෙවූ වෛද්ය බිල්පත් හේතුවෙන් ඩුබායි රෝහලක් ඇගේ විදේශ ගමන් බලපත්රය වසර තුනකට ආසන්න කාලයක් රඳවාගෙන සිටින බවත්, එමඟින් ඇය සහ ඇගේ දරුවා වලංගු සංචාරක ලියකියවිලි නොමැතිව සිටින බවත් ඇය කියාසිටී.
පසු කාලීන දින යෙදු චෙක්පත් භාවිත කරමින් ඇගේ නමින් ලබාගත් නවාතැන් සඳහා කළයුතු ගෙවීම් ඇතුළුව නීතිමය සහ මූල්යමය බාධක රැසකට තමන් මුහුණ දී සිටින බව ද කාන්තාව සඳහන් කළාය.
“දැනට, මම මගේ නමින් නවාතැන් ලබාගෙන තිබුණු නිසා මට නීතිමය ගැටලුත් තියෙනවා… ඒ වගේම ඒ ගෙවීම් පියවන්න මට ක්රමයක් නැහැ. දැනටත් මට විසඳුමක් නැහැ… ඒ වගේම, මගේ දරුවාට සහ මට වලංගු වීසා බලපත්රයක් නැහැ, කිසිම තැනක රැකියාවක් ලබා ගන්නත් බැහැ.” ඇය එම සටහනේ සඳහන් කළාය.
කාන්තාව අවධාරණය කළේ ඇය මූල්ය ආධාර ඉල්ලා නොසිටින අතර ශ්රී ලංකාවට නැවත පැමිණීමට පමණක් රජයේ සහාය ඉල්ලා සිටින බවත්ය.
නියෝජ්ය අමාත්යවරයා වාර්තාකරුවන්ට පැවසුවේ තමා එම කාන්තාව සමඟ පෞද්ගලිකව කතාකළ බවත්, ඒ අනුව ඇය ශ්රී ලංකා තානාපති කාර්යාලයට මේ වනවිට ප්රකාශයක් ලබා දී ඇති බවත්ය.
“ඇය සහ දරුවා නිසි නිල මාර්ග හරහා නැවත ගෙන්වා ගැනීමට අවශ්ය කටයුතු සම්පාදනය කිරීම සඳහා මගේ කාර්යාලය දැනට අබුඩාබියේ අපගේ තානාපති අංශ සහ එක්සත් අරාබි එමීර් රාජ්යයේ අදාළ බලධාරීන් සමඟ සමීප සහයෝගයෙන් කටයුතු කරමින් සිටිනවා,” නියෝජ්ය අමාත්යවරයා පැවසීය.
නඩුවට සම්බන්ධ නොවිසඳුණු මූල්ය හිමිකම් සහ නීතිමය වගකීම් නිලධාරීන් දැනට සමාලෝචනය කරමින් සිටින බව ඔහු පැවසීය.
ඔවුන් නැවත ගෙන්වාගැනීම සිදුවන්නේ කවදාද යන්න සඳහා නිශ්චිත කාලරාමුවක් දැනට ස්ථාපිත කර නොමැත.
