මෙරට සේවකයන් 374,000ක් පමණ දිට්වා සුළි කුණාටුවෙන් පීඩාවට පත්ව ඇති බව අන්තර්ජාතික කම්කරු සංවිධානය විසින් කරන ලද පර්යේෂණයකින් පෙනීගොස් තිබේ.

මෙම සේවකයන්ට වෙනත් තැනක වැඩකිරීමට හෝ ගුණාත්මක රැකියාවක් සොයා ගැනීමට නොහැකි වුවහොත් මසකට අහිමි විය හැකි ආදායම අමෙරිකානු ඩොලර් මිලියන 48ක් බව අන්තර්ජාතික කම්කරු සංවිධානය ඇස්තමේන්තු කරයි.

ශ්‍රී ලංකාවට කඩා වැදුණු දිට්වා සුළි කුණාටුවේ විනාශකාරී බලපෑම විස්තර කරමින් රටේ විශාල ප්‍රදේශ පරමානයකට විනාශකාරී වැසි සහ නායයෑම් ඇති වූ බව අන්තර්ජාතික කම්කරු සංවිධානය විසින් නිකුත් කරන ලද නව කෙටි විස්තරයක සඳහන් වේ.

උතුර සහ නැගෙනහිර දිස්ත්‍රික්කවල වඩාත් දරුණු ගංවතුර ඇති වූ අතර, බොහෝ තේ වතු පිහිටා ඇති මධ්‍යම කඳුකරයේ ප්‍රදේශවල නායයෑම් ඇති විය.

කම්කරුවන්ට ශ්‍රම වෙළඳපොලේ නැවත ස්ථානයක් ලබා ගැනීමට උපකාර කිරීම සඳහා හදිසි ප්‍රතිචාර සහ මධ්‍ය කාලීන සහාය යන දෙක සඳහාම මඟ පෙන්වීම වාර්තාවේ අරමුණ බව අන්තර්ජාතික කම්කරු සංවිධානය සඳහන් කළේය.

කෘෂිකර්මාන්තය සහ ධීවර අංශ දැඩි ලෙස පීඩාවට පත්ව ඇති බව අන්තර්ජාතික කම්කරු සංවිධානය සංවිධානය පැවසීය.

සහල් වගා කරන ඉඩම්වලින් සියයට 23ක් දක්වා ගංවතුරෙන් බලපෑමට ලක්ව ඇති අතර, තේ කර්මාන්තයේ නිෂ්පාදන පාඩු පිළිබඳ මූලික ඇස්තමේන්තුව සියයට 35ක් තරම් ඉහළ අගයක් ගත හැකි බව එම සංවිධානය කියයි.

මෙම විනාශකාරී තත්වයන් සැළකිල්ලට ගනිමින්, ජීවනෝපායන් යථා තත්ත්වයට පත් කිරීම සඳහා සහාය වීමට ක්ෂණික පියවර ගන්නා ලෙස අන්තර්ජාතික කම්කරු සංවිධානය ඉල්ලා සිටී.

නිෂ්පාදන මාධ්‍යයන් කඩිනමින් යථා තත්ත්වයට පත් කිරීම සඳහා සුළු හා මාධ්‍ය පරිමාණ ව්‍යවසාය සඳහා නිශ්චිත අංශ සහයෝගය සහ සහාය සමඟ ඒකාබද්ධව, හදිසි මුදල් ආධාර සහ යහපත් සේවා කොන්දේසි සහතික කරන ප්‍රතිසාධන ක්‍රියාකාරකම් පුළුල් ලෙස ක්‍රියාත්මක කිරීමට කෙටි කාලීනව ප්‍රමුඛතාව දිය යුතු බව අන්තර්ජාතික කම්කරු සංවිධානය පැවසීය.

එවැනි වැඩසටහන් වඩාත් අවදානමට ලක්විය හැකි අයට ප්‍රමුඛත්වය දිය යුතු බවත් ගැටුම්වලට සංවේදී විය යුතු බවත් කම්කරුවන්ගේ සහ සේවා යෝජකයන්ගේ සංවිධානය හරහා වැඩ කළ යුතු බවත් සහ ප්‍රජා කොටස්කරුවන් සමඟ සෘජුව අන්තර් ක්‍රියා කළ යුතු බවත් එම සංවිධානය කියයි.

වැටුප් ආරක්ෂාව, සමාජ ආරක්ෂාව, රැකියා ප්‍රතිපත්ති සහ ආපදා අවදානම් කළමනාකරණ රාමු අතර ආවරණය, ප්‍රමාණවත් බව සහ සම්බන්ධීකරණය වැඩි දියුණු කිරීම සඳහා මධ්‍ය කාලීන ප්‍රතිසාධන උත්සාහයන් ඒකාබද්ධ කළ යුතු බව අන්තර්ජාතික කම්කරු සංවිධානය තවදුරටත් පැවසීය.