හිටපු කථානායක අශෝක රන්වල තම ආචාර්ය උපාධිය සම්බන්ධයෙන් වංචාවක් සිදු කර ඇත්නම් ජාතික ජන බලවේගය ඔහුට එරෙහිව විනය ක්‍රියාමාර්ග ගන්නා බව සෞඛ්‍ය අමාත්‍ය නලින්ද ජයතිස්ස පවසයි.

පෞද්ගලික රූපවාහිනී නාලිකාවක් ඔස්සේ විකාශය වූ වැඩසටහනකදී ඔහු පැවසුවේ එවැනි අවස්ථාවක අශෝක රන්වලට එරෙහිව ගත යුතු ක්‍රියාමාර්ගය මොනවාද යන්න පක්ෂය මෙතෙක් තීරණය කර නොමැති බවයි.

ජාතික ජන බලවේගයට ඡන්දය දුන් සහ ඡන්දය නොදුන් පුද්ගලයින් මෙම කාරණය පිළිබඳ සාකච්ඡා කර ඇති බවත්, ඒ සම්බන්ධයෙන් පියවර ගැනීමේදී ඔවුන්ගේ මතය සලකා බැලිය යුතු බවත් අමාත්‍යවරයා පැවසීය.

එමෙන්ම අමාත්‍යවරයා පෙන්වා දුන්නේ පාර්ලිමේන්තු මන්ත්‍රී අශෝක රන්වල ඉක්මනින් සිය උපාධි සහතිකය ඉදිරිපත් කරන බවට පක්ෂයට පොරොන්දු වූ නමුත් ඔහු මෙතෙක් එය සිදු කර නොමැති බවයි.

“අශෝක රන්වල ඉක්මනින් සහතිකය ඉදිරිපත් කරන බව මම වරක් කැබිනට් තීරණ දැනුම්දීමේ ජනමාධ්‍ය හමුවකදී පැවසුවා. රන්වල මන්ත්‍රීවරයා ඒ අවස්ථාවේ පක්ෂයට පැවසූ දේ තමයි මම කිව්වේ. කෙසේ වෙතත්, ඔහු මෙතෙක් එය ඉදිරිපත් කර නැහැ,” ඔහු පැවසීය.