දිත්වා සුළිකුණාටුවේ බලපෑමෙන් ඇතිවූ ආපදාවෙන් අනතුරුව සිදුකෙරෙන ප්‍රතිසාධන කටයුතු වලදී භූගත ෆයිබර් ඔප්ටික් සහ තඹ කේබල්වලට හිතාමතා හානි කිරීම සහ සොරකම් කිරීම දඬුවම් ලැබිය හැකි වරදක් බව ඩයලොග් ආසිආටා පීඑල්සී පවසයි.

නිරාවරණය වූ කේබල් විකෘති කර හෝ ඉවත් කර ඇත්නම් වහාම ළඟම ඇති පොලිස් ස්ථානයට දැනුම්දෙන ලෙස සමාගම මහජනතාවගෙන් ඉල්ලා සිටින අතර, අත්‍යවශ්‍ය සේවාවන් ආරක්ෂා කිරීමට සහ ප්‍රතිසංස්කරණය වේගවත් කිරීමට එවැනි වාර්තා අත්‍යවශ්‍ය බව ද සමාගම අවධාරණය කර ඇත.

මේ අතර නිවේදනයක් නිකුත් කරමින් පොලිසිය පැවසුවේ රට පුරා ප්‍රදේශ රැසකට බලපෑ දැඩි ආපදා තත්ත්වය හේතුවෙන් ඇතැම් පුද්ගලයන් භූගත සන්නිවේදන කේබල්වලට (ෆයිබර් ඔප්ටික් සහ තඹ යන දෙකම) හානි කර හෝ සොරකම් කර ඇති අතර එමඟින් අත්‍යවශ්‍ය සේවාවන්ට බාධා එල්ල වී ඇති බවයි.

ආපදාවට ලක් වූ ප්‍රදේශවල සිදුකරන ලද මාර්ග අලුත්වැඩියාවන්හිදී භූගත විදුලි සහ සන්නිවේදන රැහැන් වලටද හානි සිදුවී ඇති බව ඩයලොග් ආසිආටා පීඑල්සී සමාගම ද ප්‍රකාශ කළේය.

මෙම සේවාවන් ඉක්මනින් යථාතත්ත්වයට පත්කිරීම අතිශයින් වැදගත් වන බැවින්, සන්නිවේදන රැහැන්වලට හානි කිරීම, ඒවා කපා ඉවත්කිරීම, ගබඩා කිරීම හෝ නීතිවිරෝධී ලෙස විකිණීම දඬුවම් ලැබිය හැකි වැරදි බව සමාගම අවධාරණය කර ඇත.

එවැනි ක්‍රියාවන් අදාළ බලධාරීන්ට වාර්තා කරන බවත්, එවැනි සිදුවීම් සිදුවුවහොත් ළඟම ඇති පොලිස් ස්ථානයට දැනුම්දෙන ලෙසත් මහජනතාවගෙන් ඉල්ලා සිටින බවත් සමාගම පවසයි.

තවද, ආපදාවට ලක් වූ ප්‍රදේශවල මාර්ග අලුත්වැඩියා කිරීමේදී භූගත සන්නිවේදන රැහැන් නිරාවරණය වුවහොත්, අදාළ ආයතනවලට වහාම දැනුම්දෙන ලෙස ද එම සමාගම මහජනතාවගෙන් ඉල්ලා ඇත.

එවැනි දැනුම්දීම ප්‍රතිසංස්කරණ කටයුතු කාර්යක්ෂමව සිදුකිරීමට සහ සේවාවන් හැකි ඉක්මනින් සාමාන්‍ය තත්ත්වයට පත් කිරීමට සහතික කිරීමට උපකාරී වනු ඇතැයි ද සමාගම පවසයි.

දිත්වා සුළිකුණාටුවේ බලපෑමෙන් අනතුරුව මතුවූ ආපදා තත්ත්වයෙන් පසුව, SLT-Mobitel සමාගම ද මීට පෙර මහජනතාවගෙන් එවැනිම ඉල්ලීමක් කර තිබිණි.