හලාවත මූලික රෝහල, මහියංගනය රෝහල සහ වත්තේගම යන රෝහල්වලට දිත්වා සුළි කුණාටුවෙන් විශාල හානියක් සිදුවී තිබේ.

තවත් කුඩා රෝහල් 100ක් ගංවතුරට හසුව තිබී ඇත.

සුළි කුණාටුවෙන් හලාවත රෝහලට විශාලතම හානිය සිදුවී ඇති අතර, සීටී ස්කෑන් යන්ත්‍රය ඇතුළු සියලුම අත්‍යවශ්‍ය වෛද්‍ය උපකරණවලට හානි සිදුවී ඇති බව සෞඛ්‍ය අමාත්‍යාංශ ලේකම් වෛද්‍ය අනිල් ජාසිංහ පැවසීය.

වෛද්‍ය ජාසිංහ පවසන්නේ මේ වන විට දිවා කාලයේ බාහිර රෝගී අංශ ප්‍රතිකාර සහ හදිසි ප්‍රතිකාර පමණක් එහි සිදු කරන බවයි.

“හලාවත රෝහල වැඩිපුරම බලපෑමට ලක්ව තිබෙනවා. ඊට අමතරව, වත්තේගම සහ මහියංගනය රෝහල්වලටත් හානි සිදුවෙලා. වත්තේගම රෝහලේ, අපි සියලුම රෝගීන් ඉවත් කළා. මෙම රෝහල්වල ඇති ඕනෑම උපකරණයක් පාවිච්චියට ගන්න පුළුවන්ද බලන්න අපි තක්සේරුවක් කරමින් ඉන්නේ,” යැයි ඔහු පැවසීය.

එපමණක් නොව, රෝහල් 100ක් පමණ ජලයෙන් යටවී තිබු බව ඔහු පැවසීය.

හානි පිළිබඳ දළ ඇස්තමේන්තුවක් තවමත් සිදු කර නොමැති බව ඔහු පැවසීය.

අන්තර්ජාතික ආයතනවලින් ලැබෙන ආධාර පිළිබඳ අදහස් දක්වමින් ඔහු පැවසුවේ, ලෝක සෞඛ්‍ය සංවිධානය මේ වන විටත් ජාතික සෞඛ්‍ය සංවර්ධන අරමුදලට රුපියල් මිලියන 53ක් ලබා දී ඇති බවයි.

ව්‍යසනයෙන් පසු සුභසාධන මධ්‍යස්ථානවල ජීවත්වන ජනතාවගේ සෞඛ්‍ය අවශ්‍යතා සෞඛ්‍ය බලධාරීන් නිතිපතා තක්සේරු කරන බව වෛද්‍ය ජාසිංහ පැවසීය.