පසුගියදා නිකුත් කෙරුණු හදිසි නීති රෙගුලාසිවල ඇතැම් විධිවිධාන ආණ්ඩුක්‍රම ව්‍යවස්ථාවට අනුකූල නොවන බව නිරීක්ෂණය ඇති බවත් ඒ බව ලබන සතියේ ජනාධිපති අනුර කුමාර දිසානායක වෙත දන්වන බවත් ශ්‍රී ලංකා මානව හිමිකම් කොමිසමේ කොමසාරිස් නීතිඥ නිමල් ජී. පුංචිහේවා ප්‍රකාශ කළේය.

ඔහු පැවසුවේ රෙගුලාසිවල ඇතැම් වගන්ති ගැටළු සහගත බව පෙනෙන අතර හදිසි නීති බලතල ආණ්ඩුක්‍රම ව්‍යවස්ථාවේ සීමාවන් තුළ ක්‍රියාත්මක කළ යුතු බවයි.

“නිශ්චිත තත්ත්වයන් යටතේ කාර්යක්ෂමව ක්‍රියා කිරීම සඳහා හදිසි නීතිය භාවිත කළ යුතු වුණත් ව්‍යවස්ථාමය විධිවිධාන ඉක්මවා යන්න බැහැ. එම අයිතිවාසිකම් ආරක්ෂා කළ යුතුයි.” යනුවෙන් ඔහු පැවසීය.

දැනට ක්‍රියාත්මක වන රෙගුලාසිවල ඇතැම් කොටස් ස්වාභාවික විපතකට අදාළ හදිසි අවස්ථාවකදී නොව සන්නද්ධ ගැටුම් කාලවලදී භාවිත කරන පියවරවලට සමාන බව ඔහු සඳහන් කළේය.

1959 අංක 8 දරන පනත මගින් සංශෝධනය කරන ලද මහජන ආරක්ෂක ආඥා පනත (40 වන පරිච්ඡේදය) මගින් හදිසි අවස්ථා පැනවීමට ඉඩ සලසයි.

එහෙත් ඒවා ඒ ඒ තත්ත්වයට ගැළපෙන පරිදි සකස් කළ යුතු බවත්, එම කාල සීමාව තුළ පැන නගින අභියෝග විසඳීමට උපකාරී වන ආකාරයෙන් හඳුන්වා දිය යුතු බවත් ඔහු වැඩිදුරටත් පැවසීය.

“අතීතයේ දී, සිවිල් යුද්ධය වැනි එම අවස්ථාවේ පැවති තත්ත්වයන්ට මුහුණ දීම සඳහා හදිසි අවස්ථා කෙටුම්පත් කෙරුණා. දැන්, රට මහා පරිමාණ ව්‍යසනයකට මුහුණ දී සිටින නිසා, අත්‍යවශ්‍ය සේවා කාර්යක්ෂමව පවත්වාගෙන යෑම සහ ප්‍රතිසාධන කටයුතු සඳහා සහාය වීමට හදිසි අවස්ථා බලතල වැදගත්. කොහොම වුණත්, වත්මන් රෙගුලාසිවල ඇතැම් කොටස් ආණ්ඩුක්‍රම ව්‍යවස්ථාවට අනුකූල නොවන බව අපිට නිරීක්ෂණය වනවා. අපි ලබන සතියේ ජනාධිපතිවරයාට අපගේ නිරීක්ෂණ ඉදිරිපත් කරනවා,” පුංචිහේවා තවදුරටත් පැවසීය.

දිත්වා සුළි කුණාටුව සමග ඇතිවූ ගංවතුර හා නායයෑම් හේතුවෙන් මහජන ආරක්ෂාව ආරක්ෂා කිරීම, මහජන සාමය සහතික කිරීම සහ අත්‍යවශ්‍ය සැපයුම් හා සේවා පවත්වාගෙන යෑමේ අවශ්‍යතාව උපුටා දක්වමින් ජනාධිපති දිසානායක පසුගිය නොවැම්බර් 28 වැනිදා 2464/30 ගැසට් පත්‍රය හරහා හදිසි තත්ත්වයක් ප්‍රකාශයට පත් කළේය.

මේ අතර, ජනාධිපතිවරයා සහ අනෙකුත් දේශපාලන බලධාරීන් පිළිබඳ අසත්‍ය තොරතුරු පැතිරීම සීමා කිරීමේ විධිවිධාන ඇතුළුව අදාළ හදිසි අවස්ථා දැඩි ලෙස ක්‍රියාත්මක කරන ලෙස නියෝජ්‍ය මහජන ආරක්ෂක අමාත්‍ය නීතිඥ සුනිල් වටගල, මෙම සතිය මුලදී පොලිස් ස්ථාන භාර නිලධාරීන්ට උපදෙස් දුන්නේය.

ඔහුගේ එම ප්‍රකාශයට දේශපාලන පක්ෂ සහ සිවිල් සමාජ කණ්ඩායම් කිහිපයක් දැඩි විවේචනයට ලක්කර තිබිණි.