ආර්ථිකයේ ඇතිවන හදිසි කම්පනවලට මුහුණදීම සඳහා ශ්‍රී ලංකා මහ බැංකුව එහි සම්පූර්ණ සාර්ව ආර්ථික පලිහ යෙදවීමට සූදානම් බව මහ බැංකු අධිපති ආචාර්ය නන්දලාල් වීරසිංහ පැවසීය.

ව්‍යාපාරික නායකයන් සහ රජයේ නිලධාරීන්ගෙන් සමන්විත පිරිසකගේ සහභාගීත්වයෙන් කොළඹදී ඊයේ පැවති 2025 ශ්‍රී ලංකා ආර්ථික හා ආයෝජන සමුළුවේදී ඔහු මේ බව කියා සිටියේය.

දිට්වා සුළි කුණාටුව සහ එහි ප්‍රතිඵල වැනි දේශගුණික ආශ්‍රිත සිදුවීම්වලින් ඇති වූ ආර්ථික බිඳවැටීම් සම්බන්ධයෙන් මතුවන කණස්සල්ල තරමක් ලිහිල් කිරීමට අධිපතිවරයාගේ මෙම අදහස් දැක්වීම හේතුවිය.

අනපේක්ෂිත පහරවල් අවශෝෂණය කර ගැනීම සඳහා ශ්‍රී ලංකාව පෙර අර්බුදවල සිටි තත්ත්වයට වඩා අද හොඳ ස්ථානයක සිටින බව ඔහු සහතික කළේය.

“මේ වසර මුලදී, අපි අනපේක්ෂිත බාහිර කම්පනයකට මුහුණ දුන්නා, ඒ නිසා අපි සැලසුම් සකස්කර සිටියේ. දේශගුණය ආශ්‍රිත කම්පන කියන්නේ අප කලින් අත්විඳ තිබෙන අභ්‍යන්තර සිදුවීම්. ඒවා හැසිරවීමේ යතුර වන්නේ ප්‍රමාණවත් සාර්ව බෆර තිබීමයි. මෙම බෆර සාමාන්‍ය තත්ත්වයන් සඳහා නෙවෙයි, මෙවැනි කාල සඳහායි,” ආචාර්ය වීරසිංහ පැවසීය.

මෙම සාර්ව බෆර දැන් ක්‍රියාත්මක වීමත් සමඟ, දේශීය හා අන්තර්ජාතික ආධාරකරුවන්ගෙන් පරිත්‍යාග හිමිවන රාජ්‍ය බැංකු ගිණුම් සමඟ, කාලෝචිත සහන ලබා දීමට මහ බැංකුව අඩිතාලම දමා ඇත.

“රජයේ පැත්තෙන්, කෙටිකාලීන මූල්‍ය සහන කළමනාකරණය කළ හැකියි. බාහිරව, අපි පෙරට වඩා හොඳ තත්ත්වයක ඉන්නේ. අවශ්‍ය නම්, සහාය ලබා දීමට අපට ප්‍රමාණවත් බෆර තිබෙනවා,” ඔහු තවදුරටත් පැවසීය.

මූල්‍යමය වශයෙන්, අවශ්‍ය නම් බැංකු පද්ධතියට ද්‍රවශීලතා සහාය ලබා දීමට මහ බැංකුව සූදානම්ව සිටී.

එහෙත් පසුගිය දින කිහිපය තුළ එවැන්නක් අවශ්‍ය වී නොමැත.

ද්‍රවශීලතා ආතතිය කළමනාකරණය කිරීම සඳහා මහ බැංකුව අතීතයේ දී එවැනි මෙවලම් භාවිත කර ඇත.

වසංගතය අතරතුර මහ බැංකුව රුපියල් බිලියන 250කට වඩා එන්නත් කළ අතර, 2022 දී ආර්ථිකය උග්‍ර ද්‍රවශීලතා හිඟයකට මුහුණ දුන් විට, පද්ධතිමය අස්ථාවරත්වය වැළැක්වීම සඳහා හදිසි සහාය යෙදවීය.

බාහිර අංශයේ බෆරය ද ශක්තිමත් වී ඇත.

මහ බැංකුවේ නවතම දත්තවලින් පෙනී යන්නේ 2025 ඔක්තෝබර් අවසානය වන විට විදේශ විනිමය සංචිත අමෙරිකානු ඩොලර් බිලියන 6.2ක් පමණ දක්වා ඉහළ ගොස් ඇති බවයි.

ශ්‍රී ලංකාව තවමත් දේශගුණික කම්පන සහ ගෝලීය බාහිර බාධකවලට ගොදුරු විය හැකි බැවින්, මූල්‍ය, මුදල් සහ සංචිත කළමනාකරණය හරහා ආයතනික අවධානය යොමු වන්නේ අස්ථාවරත්වය හමුවේ ආර්ථිකය පුරා ස්ථාවරත්වය ආරක්ෂා කිරීම කෙරෙහි බව අධිපතිවරයා සඳහන් කළේය.