November 4, 2025
විපක්ෂ නායක සජිත් ප්‍රේමදාස ඉන්දියාවේ සංචාරයක නිරත වී සිටියි.
එම සංචාරයට සමගාමීව ඔහු නවදිල්ලියේදී ඉන්දීය කර්මාන්ත සම්මේලනයේ ජ්‍යෙෂ්ඨ නියෝජිතයන් හමුවූ අතර, වෙළඳාම, ආයෝජන සහ තාක්ෂණය යන ක්ෂේත්‍රවල ද්විපාර්ශ්වික සහයෝගීතාව වැඩිදියුණු කිරීම පිළිබඳ පුළුල් සංවාදයකට ද සහභාගී වී තිබේ.
එමෙන්ම සිය ඉන්දීය සංචාරය අතරතුර විපක්ෂ නායකවරයා වෙළඳ ප්‍රවාහ සහ ආයෝජන සඳහා පහසුකම් සැලසීම වෙනුවෙන් ඉන්දු – ශ්‍රී ලංකා ඒකාබද්ධ ආර්ථික කොමිසම යටතේ මෙහෙයුම් කාර්ය සාධක බලකායක් පිහිටුවීමට යෝජනා කළේය.
ඉන්දීය කර්මාන්ත සඳහා සහාය වීම වෙනුවෙන් කැපවූ ඉන්දු – ලංකා කාර්මික හා තාක්ෂණික වෙළඳ කලාපයක් ශ්‍රී ලංකාවේ නිර්මාණය කිරීමට ද ඔහු යෝජනා කළේය.
පුනර්ජනනීය බලශක්තිය, කෘෂිකාර්මික සැකසුම්, සැපයුම්, සංචාරක සහ අර්ධ සන්නායක වැනි ප්‍රමුඛතා අංශ හඳුනාගැනීම සඳහා ශ්‍රී ලංකා-CII ව්‍යාපාර කවුන්සිලයක් පිහිටුවීමට ද ඔහු නිර්දේශ කළේය.
ශ්‍රී ලංකාවේ සිය මෙහෙයුම් පුළුල් කරන ලෙස ඉන්දීය ව්‍යවසායකයන්ට ආරාධනා කළ විපක්ෂ නායකවරයා බහුපාර්ශවික ව්‍යවස්ථාදායක සහාය හරහා පූර්ණ පහසුකම් සහතික කරමින් විදේශ සෘජු ආයෝජන සඳහා ඇති ඕනෑම බාධකයක් ඉවත් කිරීමට පොරොන්දු විය.
ඉන්දියාවේ අර්ධ සන්නායක මුලපිරීම් යටතේ ශ්‍රී ලංකාව අනුපූරක නිෂ්පාදන සහ සැකසුම් මධ්‍යස්ථානයක් කිරීම සඳහා ඔහු කැමැත්ත පළ කළේය.
සියලුදෙනා ඇතුළත්, තාක්ෂණය මත පදනම් වූ සංවර්ධනය අවධාරණය කරමින්, විපක්ෂ නායකවරයා පෙන්වා දී ඇත්තේ වර්ධනය ජනතාව කේන්ද්‍ර කරගත් සහ ජනතාව විසින් මෙහෙයවනු ලබන එකක් විය යුතු බව සහ ප්‍රගතියේ ප්‍රතිලාභ සමාජයේ සියලු කොටස් වෙත ළඟාවිය යුතු බවයි.
ඉන්දියාවේ නිෂ්පාදන හා තාක්‍ෂණයේ නැගීම ශ්‍රී ලංකාවට අභියෝගයක් ලෙස නොසැලකිය යුතු බවත්, අනාගත සහයෝගීතාව සඳහා අවස්ථාවක් ලෙස සැලකිය යුතු බවත් ඔහු අවධාරණය කළේය.
