ගණේමුල්ලේ සංජීව අලුත්කඩේ උසාවි සංකීර්ණයේදී වෙඩිතබා ඝාතනය කිරීමේ සිද්ධියේ මහමොළකාරිය ලෙස සැලකෙන ඉෂාරා සෙව්වන්දිට එම සිද්ධියෙන් පසු මාසයකට ආසන්න කාලයක් මතුගම ප්‍රදේශයේ සැඟවී සිටීමට පහසුකම් සලසා ඇත්තේ මතුගම කුප්‍රකට පාතාල නායකයකු විසින් බව පොලිස් විමර්ශනවලින් අනාවරණය වී ඇත.

පොලිසිය පවසන්නේ කෙහෙල්බද්දර පද්මේ සහ මතුගම මෙම පාතාල නායකයා සමීප මිතුරන් බවත්, ඒ මිතුදම නිසා ඉෂාරා සෙව්වන්දීට සැඟවී සිටීමට අවශ්‍ය පහසුකම් ඔහු විසින් සලසා දී ඇති බවත්ය.

මාසයකට ආසන්න කාලයක් ඉෂාරා සෙව්වන්දි මතුගම රැඳීසිටිමින් සිය ස්වරූපය වෙනස්කරගෙන ඇත. දිගට තිබූ කොණ්ඩය කොටට කපා සිය රූපසෝභාවද වෙනස්කර ගැනීමට ඇය පියවර ගෙන ඇත.

මතුගම ප්‍රදේශයේ රහසිගත ස්ථාන කීපයක සැඟවී සිටීමට අවශ්‍ය පහසුකම් මතුගම පාතාල නායකයා විසින් ඇයට සලසා දී තිබේ.

විදේශගතව සිටින මෙම පාතාල නායකයා සිය කල්ලියේ සාමාජිකයන් යොදාගෙන සෙව්වන්දිගේ සුවදුක් සොයාබලා ඇයට නවාතැන් ගෙන සිටීමට අවශ්‍ය පහසුකම් ලබාදී ඇති බව මේ වනවිට විමර්ශනවලින් හෙළිවී ඇත.

ඉෂාරා සෙව්වන්දි මතුගම සැඟවී සිටින බවට කොළඹ අපරාධ කොට්ඨාසය වෙත තොරතුරක් ලැබීමෙන් පසු පොලිසිය එම ප්‍රදේශය පීරමින් සෙව්වන්දි පිළිබඳ තොරතුරු සොයා ඇත.

එහෙත් ඒ වනවිටත් ඇය මතුගම ප්‍රදේශය අතහැර මාතරට පළාගොස් තිබිණි.

මාතර දින කීපයක් ගතකළ ඇය යාපනයට ගොස් එතැන් සිට මුහුදු මාර්ග ඔස්සේ ඉන්දියාවට පළාගොස් තිබිණි.

ඉෂාරා සෙව්වන්දි ඇතුළු සැකකරුවන් සිව්දෙනා පැය 72 ක් රඳවාගෙන ප්‍රශ්න කිරීමට අවසර ලබාගෙන ඇත.

කොට්ඨාස භාර ජ්‍යෙෂ්ඨ පොලිස් අධිකාරිවරයාගේ අවසරය මත මෙම රැඳවුම් නියෝගය ලබාගෙන ඇති බව පොලිස් මූලස්ථාන ආරංචි මාර්ග පැවසීය.

ඒ අනුව අත්අඩංගුවේ සිටින ඉෂාරා සෙව්වන්දි, ජේ. කේ. බායි, සුරේෂ් තක්ෂි යන සැකකරුවන් පැය 72 ක් රඳවා තබාගෙන ප්‍රශ්න කිරීමට කොළඹ අපරාධ කොට්ඨාසය කටයුතු කරමින් සිටී.(දිවයින)