2025 ජනවාරි 01 වන දින සිට ඔක්තෝබර් 13 වන දින දක්වා කාලය තුළ පුද්ගලයින් මිලියන 5.7 ක් පරීක්ෂාවට ලක් කර ඇති බව පොලිසිය පවසයි.

ජනමාධ්‍ය හමුවේ අදහස් දක්වමින් පොලිස් මාධ්‍ය ප්‍රකාශක සහකාර පොලිස් අධිකාරී එෆ්.යූ. වූට්ලර් පැවසුවේ මෙම කාලය තුළ ශරීර පරීක්ෂාවන් සහ ප්‍රශ්න කිරීම් ඇතුළු පරීක්ෂණ සිදු කළ බවයි.

දිනපතා සිදු කරන ලද වැටලීම් සහ විශේෂ මෙහෙයුම් වලදී අවශ්‍ය සැකකරුවන් 4802 ක් අත්අඩංගුවට ගෙන ඇති බවත්, ඔවුන්ට එරෙහිව නීතිමය පියවර ගැනීමට පියවර ගනිමින් සිටින බවත් ඔහු තවදුරටත් පැවසීය.

මේ වසරේ මේ දක්වා සංවිධානාත්මක අපරාධකරුවන්ට අයත් රුපියල් මිලියන 730 ක් වටිනා වත්කම් අත්හිටුවා ඇති බව ද පොලිස් මාධ්‍ය ප්‍රකාශකවරයා තවදුරටත් අනාවරණය කළේය.

2021 සිට 2024 දක්වා කාලය තුළ රුපියල් බිලියන 39.02 ක් වටිනා වත්කම් පොලිසිය විසින් අත්හිටුවා රාජසන්තක කර ඇති බව ද ඔහු පැවසීය.

ඒ අනුව පොලිසිය විසින් රාජසන්තක කරන ලද නීති විරෝධී ලෙස අත්පත් කරගත් වත්කම් අතර රන් පවුම් 354, වාහන 72 ක්,නිවාස 35 ක්, මුදලින් රුපියල් මිලියන 670 ක් සහ අක්කර 34 ක ඉඩම් කැබලි පවතී.

නීති විරෝධී ලෙස අත්පත් කරගත් වත්කම් අත්පත් කර ගැනීමේ පොලිස් මෙහෙයුම් අඛණ්ඩව සිදු කරන බව ද පොලිස් මාධ්‍ය ප්‍රකාශකවරයා වැඩිදුරටත් පැවසීය.