සංවිධානාත්මක අපරාධ කල්ලියක ප්‍රධාන සාමාජිකයකු සහ ප්‍රසිද්ධ මත්ද්‍රව්‍ය ජාවාරම්කරුවකු ලෙස කුප්‍රකට ‘පොට්ට අමිල’ නමැත්තා මොරගහහේන පොලිසිය විසින් අත්අඩංගුවට ගෙන ඇති අතර ඔහුගේ සමීපතමයන් තිදෙනෙකු ද අත්අඩංගුවට ගෙන තිබේ.

සැකකරුවන් සතුව මත්ද්‍රව්‍ය පෙති 5,300 ක් සහ ස්ඵටික මෙතම්ෆෙටමින් (අයිස්) මිලිග්‍රෑම් 15,000 ක් තිබී සොයාගෙන ඇත.

මෙම මත්ද්‍රව්‍යවල ඇස්තමේන්තුගත වීදි වටිනාකම රුපියල් මිලියනයක් පමණ වේ.

මත්ද්‍රව්‍ය ජාවාරම් කටයුතු සඳහා භාවිත කළ බවට විශ්වාස කෙරෙන ජංගම දුරකථන තුනක් ද පොලිසිය විසින් අත්අඩංගුවට ගෙන ඇත.

පොට්ට අමිලගේ සහචරයෙකු ගෝනපොල කුඹුකවත්ත ප්‍රදේශයේ අයිස් බෙදාහැරීම සඳහා පැමිණි අවස්ථාවේදී මුලින්ම අත්අඩංගුවට ගත් බව පොලිසිය සඳහන් කළේය.

මොරගහහේන පොලිසියේ, අපරාධ විමර්ශන අංශයේ සහ විශේෂ කාර්ය බලකායේ (STF) නිලධාරීන්ට ලැබුණු බුද්ධි තොරතුරු මත පදනම්ව, පරීක්ෂාවක් සිදුකර ඇති අතර ඔහු අයිස් මිලිග්‍රෑම් 2,200 ක් රැගෙන යන බව සොයා ගෙන ඇත.

ප්‍රශ්න කිරීමේදී සැකකරු හෙළිකර ඇත්තේ, මෙම මත්ද්‍රව්‍ය පොට්ට අමිල විසින් තවත් පුද්ගලයෙකුට භාරදීම සඳහා ඔහුට ලබාදුන් බවයි.

මෙම තොරතුරු මත පොලිසිය පොට්ට අමිලගේ නිවස වටළා ඔහු සහ තවත් පුද්ගලයන් දෙදෙනෙකු අත්අඩංගුවට ගෙන තිබේ.

වැටළීමේදී පොට්ට අමිල සතුව තිබී ‘අයිස්’ මිලිග්‍රෑම් 10,100 ක් සහ මත්ද්‍රව්‍ය පෙති 5,000 ක් පොලිසිය විසින් සොයාගෙන තිබේ.

ඊට අමතරව, අනෙක් සැකකරුවන් දෙදෙනා සතුව තිබී අයිස් මිලිග්‍රෑම් 2,100 ක් සහ පෙති 300 ක් සොයාගෙන ඇත.

පොට්ට අමිල යනු දැනට බූස්ස බන්ධනාගාරයේ රඳවා සිටින කුප්‍රකට පාතාල චරිත වන ‘මෝල් කසුන්’ සහ ‘මන්න රමේෂ්’ගේ සමීපතමයකු බව ද පොලිසිය අනාවරණය කළේය.

මීට වසර කිහිපයකට පෙර ප්‍රතිවාදී කල්ලියක් සමඟ ඇති වූ ආරවුලකදී ඇසිඩ් ප්‍රහාරයකට ගොදුරු වීමෙන් පසු ඔහුගේ ඇස් පෙනීමට හානි සිදුවී ඇති බව වාර්තා වේ.

සැකකරුවන් සිව්දෙනා හොරණ මහේස්ත්‍රාත් අධිකරණයට ඉදිරිපත් කිරීමට නියමිත අතර මොරගහහේන පොලිසිය වැඩිදුර පරීක්ෂණ පවත්වයි.