තම පියාගේ ලොකුම පැතුම වූයේ සාර්ථක ක්‍රිකට් ක්‍රීඩකයකු වීම දැකීම බවත්, එම සිහිනයට ගරු කිරීමට අධිෂ්ඨාන කරගෙන සිටින බවත් ශ්‍රී ලංකා තුන් ඉරියව් ක්‍රීඩක දුනිත් වෙල්ලාලගේ පවසයි.

තම පියාගේ හදිසි අභාවයෙන් පසු ආසියානු කුසලානය අතරතුර කෙටි කලකට නිවසට පැමිණි වෙල්ලාලගේ, අද (20) උදෑසන නැවතත් ශ්‍රී ලංකාවෙන් පිටත්ව ගොස් තම කණ්ඩායමේ සාමාජිකයන් සමඟ එක්වීමට පෙර මෙම අදහස් පළ කළේය.

“මම කුඩා කාලයේ ඉඳලම තාත්තා මට හැමදේකටම සහයෝගය ලබා දුන්නා. ඔහුගේ එකම සිහිනය වූයේ මම හොඳ ක්‍රීඩකයකු බවට පත් වී ශ්‍රී ලංකාව නියෝජනය කිරීමයි. එය ඉදිරියට ගෙන යන්න මම කටයුතු කරනවා. ආසියානු කුසලානයේ තවත් තරඟ ඉතිරිව තිබෙනවා, කණ්ඩායම වෙනුවෙන් මගේ උපරිමය දෙන්න මම බලාපොරොත්තු වනවා” යැයි වෙල්ලාලගේ පැවසීය.

ප්‍රධාන පුහුණුකරු සනත් ජයසූරිය, නායක චරිත් අසලංක, ඔහුගේ සෙසු ක්‍රීඩකයන් සහ මෙරට ජනතාවගෙන් ලැබුණු දිරිගැන්වීම මෙම දුෂ්කර මොහොතට ධෛර්යයෙන් යුතුව මුහුණ දීමට ශක්තිය ලබා දී ඇති බව ඔහු තවදුරටත් පැවසීය.

“උදේ ඉඳන් රෑ වෙනකම් මගේ තාත්තා මගේ ක්‍රිකට් ක්‍රීඩාවට කාලය කැප කළා. ජාතික ක්‍රීඩකයෙක් විදිහට මම අද මෙතන ඉන්නේ ඔහුගේ කැපකිරීම් නිසා. ඔහුගේ ආශාවන් මොනවාද කියලා මම හරියටම දන්නවා, ඒවා ඉටු කරන්න මම කැපවෙලා ඉන්නවා,” යැයි වෙල්ලාලගේ පැවසීය.

හිටපු ක්‍රිකට් ක්‍රීඩකයකු වූ සුරංග වෙල්ලාලගේ හදිසි හෘදයාබාධයක් හේතුවෙන් පසුගියදා මියගියේය.

ඔහුගේ මරණය සිදු වූයේ දුනිත් ඇෆ්ගනිස්ථානයට එරෙහිව අබුඩාබියේදී පැවති ආසියානු කුසලාන B කාණ්ඩයේ තරඟයේදී ශ්‍රී ලංකාව නියෝජනය කළ දිනයේමයි.

වෙල්ලාලගේ එක්සත් අරාබි එමීර් රාජ්‍යයේ සිටින ශ්‍රී ලංකා සංචිතයට නැවත එක් වීම සඳහා අද උදෑසන පිටත්ව ගිය අතර අද රාත්‍රියේ ඩුබායිහිදී බංග්ලාදේශයට එරෙහිව පැවැත්වෙන ආසියානු කුසලාන සුපිරි හතරේ තරඟයේදී තෝරා ගැනීමට සළකා බලනු ඇත.

කණ්ඩායම් ආරංචි මාර්ග පැවසුවේ ඩුබායි කඩුල්ල දඟ පන්දු යවන්නන්ට සහාය වනු ඇතැයි අපේක්ෂා කරන බැවින් වෙල්ලාලගේ ක්‍රීඩා කරන XI කණ්ඩායමට ඇතුළත් වීමේ සම්භාවිතාව වැඩි බවයි.