ඊශ්‍රායලය සහ පලස්තීනය අතර ද්වි-රාජ්‍ය විසඳුමක් සඳහා ‘ප්‍රත්‍යක්ෂ, කාලානුරූපී සහ ආපසු හැරවිය නොහැකි පියවර’ ඉල්ලා සිටින ප්‍රකාශයක් අනුමත කිරීමට එක්සත් ජාතීන්ගේ මහා මණ්ඩලයේ දී අති බහුතරයක් ඊයේ ඡන්දය ප්‍රකාශ කළහ.

පිටු හතකින් යුත් මෙම ප්‍රකාශය ජූලි මාසයේදී එක්සත් ජාතීන්ගේ සංවිධානයේ පැවති අන්තර්ජාතික සමුළුවකින් ආරම්භ වූ අතර, ඊට සෞදි අරාබිය සහ ප්‍රංශය සම-සත්කාරකත්වය දරා තිබිණි.

දශක ගණනාවක් පුරා පැවති ගැටුම විසඳීමට දරන උත්සාහයන් නැවත ඇති කිරීමට මෙමගින් උත්සාහ කෙරිණි.

එක්සත් ජනපදය සහ ඊශ්‍රායලය එම රැස්වීම වර්ජනය කළහ.

යෝජනාවට පක්ෂව ඡන්ද 142ක් සහ විරුද්ධව ඡන්ද 10ක් ලැබුණු අතර ඡන්දය දීමෙන් වැළකී සිටි රටවල් සංඛ්‍යාව 12කි.

ශ්‍රී ලංකාව ද ඊට පක්ෂව ඡන්දය දුන් රටවල් අතර විය.

ඊශ්‍රායල සහ පලස්තීන යන දෙපිරිසගේම අයිතිවාසිකම් ආරක්ෂා කිරීම සඳහා සාකච්ඡා ඉදිරියට ගෙන යෑම සඳහා සංයුක්ත පියවර සඳහා වන ඉල්ලීම් සමඟ, මැද පෙරදිග සාමය සඳහා පදනම ලෙස ද්වි-රාජ්‍ය විසඳුමක් ක්‍රියාත්මක කිරීමේ හදිසි අවශ්‍යතාව මෙම ප්‍රකාශයෙන් අවධාරණය කෙරේ.

සාම ක්‍රියාවලියේ අනාගතය කේන්ද්‍රීය කාරණයක් වනු ඇතැයි අපේක්ෂා කරන එක්සත් ජාතීන්ගේ සංවිධානයේ ලෝක නායකයන්ගේ රැස්වීමකට පෙර මෙම ඡන්දය පැවැත්විණි.