එක්සත් ජාතීන්ගේ සරණාගතයන් පිළිබඳ වැඩසටහනේ(UNHCR) සහාය ඇතිව ඉන්දියාවෙන් ආපසු පැමිණි 75 හැවිරිදි ශ්‍රී ලාංකික සරණාගතයෙකු ඊයේ මල්ලාකම් මහේස්ත්‍රාත් අධිකරණය විසින් නිදහස් කරන ලදී.

ඔහුව පලාලි ගුවන් තොටුපළේදී අත්අඩංගුවට ගනු ලැබුවේ “නීතිගත නොකළ වරායක් හරහා සංක්‍රමණය වූ” බවට චෝදනා කරමිනි.

මෙම අත්අඩංගුවට ගැනීම හිටපු මන්ත්‍රී සහ නීතිඥ එම්. ඒ. සුමන්තිරන් විසින් විවේචනයට ලක් කරන ලද අතර, ඔහු පැවසුවේ එම පුද්ගලයා අදාළ ආයතනවලින් අවශ්‍ය සියලු අවසරයන් ලබාගෙන ඇති බවයි.

මෙම පියවර නැවත මෙරටට පැමිණීමට ලියාපදිංචි වී සිටින තවත් සරණාගතයන් 10,000 කට ආසන්න සංඛ්‍යාවක් අධෛර්යමත් කළ හැකි බවට ඔහු අනතුරු ඇඟවීය.

යල්පැන ගිය යුද කාලීන නීතියක් ස්වයංක්‍රීයව යෙදීමෙන් අත්අඩංගුවට ගැනීම සිදු වූ බවත්, එය වත්මන් රජයේ ප්‍රතිපත්තිය පිළිබිඹු නොකරන බවත් අමාත්‍ය බිමල් රත්නායක මේ සම්බන්ධයෙන් අදහස් දක්වමින් පැවැසීය.

එම නීතිය බොහෝ කලකට පෙර සංශෝධනය කළ යුතුව තිබූ බව ඔහු සඳහන් කරයි.

වහාම මෙම නීති ප්‍රතිසංස්කරණ කිරීම සඳහා අමාත්‍ය ආනන්ද විජේපාල සමඟ කතා කළ බවද ඇමැති රත්නායක පැවැසීය.

තමන් 2007 දී ඉන්දියාවේ සරණාගත කඳවුරුවලට ගොස් 28,500 කට වැඩි ශ්‍රී ලාංකිකයන්ට පුරවැසිභාවය ලබාදුන් 2008 නීතියකට සහාය දුන් බව ද ඔහු සිහිපත් කළේය.

මේ අතර, එක්සත් ජාතීන්ගේ නේවාසික සම්බන්ධීකාරක මාර්ක්-ඇන්ඩ්‍රේ ෆ්‍රැන්චේ, අදාළ පුද්ගලයාගේ නිදහස් කිරීම සඳහා රජයේ ප්‍රතිපත්ති වෙනස අගය කර ඇත.

“දශක ගණනාවක් තිස්සේ අවතැන් වූ සියලුම ආපසු පැමිණෙන සරණාගතයින් පිළිගැනීම සම්බන්ධයෙන් අපි රජයට ප්‍රශංසා කරමු,” ෆ්‍රැන්චේ පැවැසීය.

“මෙම වැදගත් ප්‍රතිපත්ති වෙනස, ශ්‍රී ලාංකික සරණාගතයන්ට නැවත සිය මව්බිමට පැමිණීමට සහ නැවත සමාජගත වීමට සහාය වීමට UNHCR හි වසර 35 කට වැඩි කාලයක් තිස්සේ කරන ලද කාර්යයට තවදුරටත් සහාය වනු ඇත.” ඔහු වැඩිදුරටත් සඳහන් කරයි.