අද උදෑසන නිකුත් කෙරුණු අ.පො.ස සාමාන්‍ය පෙළ විභාග ප්‍රතිඵල අනුව විභාගයට පෙනීසිටි සිසුන්ගෙන් 73.45%ක් අ.පො.ස. උසස් පෙළ විභාගය සඳහා සුදුසුකම් ලබා ඇතැයි විභාග කොමසාරිස් ජනරාල් ඒ.කේ.එස්. ඉන්දිකා කුමාරි ලියනගේ පවසයි.

එමෙන්ම ඇය පෙන්වාදුන්නේ, අයැදුම්කරුවන්ගෙන් 2.34%ක් සියලුම විෂයයන් අසමත් වී ඇති බවයි.

විභාගයට පෙනීසිටි සිසුන්ගෙන් 13,392ක් විෂයන් නවයටම ‘A’ සාමාර්ථ ලබා ගනිමින් විශිෂ්ට ප්‍රතිඵල හිමිකර ගෙන ඇති බවත්, එය ප්‍රතිශතයක් ලෙස සමස්ත අයැදුම්කරුවන්ගෙන් 4.15%ක් පමණ වන බවත් ඇය පෙන්වාදෙයි.

පළාත් අනුව ප්‍රතිඵල පිළිබඳ සළකා බැලීමේදී ඉහළම සාමාර්ථ අනුපාතය වන 75.64% වාර්තා වී ඇත්තේ දකුණු පළාතෙනි.

ඊට අමතරව බස්නාහිර පළාත – 74.47%, මධ්‍යම පළාත – 73.91%, නැගෙනහිර පළාත – 74.26%, සබරගමුව පළාත – 73.44%, ඌව පළාත – 73.14%, වයඹ පළාත – 71.47%, උතුරු මැද පළාත – 70.24% ක් සහ උතුරු පළාත – 69.86% ක් ලෙස සාමාර්ථ අනුපාතය වාර්තා වේ.

විෂය අනුව කාර්යසාධනය තුළ සිසුන්ගෙන් 69.07% ගණිතය සමත්ව ඇති අතර, 71.06% ක ප්‍රතිශතයක් විද්‍යාව විෂයත්, 73.82% ඉංග්‍රීසි විෂයත් සමත්ව තිබේ.