දුම්රිය දෙපාර්තමේන්තුවේ සක්‍රීය ධාවනය සඳහා අවම වශයෙන් එන්ජින් 74ක් අවශ්‍ය වුවද, දැනට පවතින එන්ජින් 98න් ධාවනය සඳහා සුදුසු මට්ටමේ පවතින්නේ එන්ජින් 50ක් පමණක් බව අභ්‍යන්තර වාර්තාවකින් හෙළි වී තිබේ.

2024 වසරේදී ධාවනය සඳහා එන්ජින් 53ක් තිබූ අතර, වර්තමානය වන විට එම පද්ධතියේ ධාවන හැකියාව තවදුරටත් පහත බැස ඇත.

කාර්යාල දුම්රිය සඳහා ප්‍රධාන වශයෙන් යොදාගන්නා බලවේග කට්ටල 242ක් තිබුණද, ඉන් දැනට ක්‍රියාත්මක වන්නේ බලවේග කට්ටල 118ක් පමණි.

සාමාන්‍ය දුම්රිය සේවාවන් පවත්වාගෙන යෑමට බලවේග කට්ටල 193ක් අවශ්‍ය වන අතර, 2024 වසරේදී පැවති 258ක බලවේග කට්ටල සමූහයෙන් 148ක්ම ධාවනයට එක්කර තිබිණි.

එන්ජින් සහ බලවේග කට්ටලවල පවතින කාර්මික දෝෂ හේතුවෙන් දිනපතා ගමන් වාර අවලංගු වීම සහ දුම්රිය ප්‍රමාද වීම් දැඩි ලෙස ඉහළ ගොස් ඇති බව දුම්රිය වෘත්තීය සමිති චෝදනා කරයි.

මෙකී තත්ත්වය සම්බන්ධයෙන් වාර ගණනාවක් දැනුවත් කළද දුම්රිය සාමාන්‍යාධිකාරීවරයා ඊට නිසි විසඳුම් ලබා දී නොමැති බවට වෘත්තීය සමිති චෝදනා කර සිටියි.

පවතින පරිපාලන සහ තාක්ෂණික අර්බුදයන්ට විසඳුම් ඉල්ලා සැප්තැම්බර් 17 වැනිදා වැඩවර්ජනයක නිරත වීමට වෘත්තීය සමිති 27ක් තීරණය කර ඇත.

සිය ගැටලු සම්බන්ධයෙන් සාකච්ඡා කිරීමට අවස්ථාවක් නොලැබුණු බව පවසමින් ශ්‍රී ලංකා අනාරක්ෂිත දුම්රිය ගේට්ටුකරුවන්ගේ සංගමයද මෙම වැඩවර්ජනයට සහය පළ කර තිබේ.

සැලසුම් කර ඇති මෙම වැඩවර්ජනය වළක්වා ගැනීම සඳහා වෘත්තීය සමිති නියෝජිතයන් සහ ප්‍රවාහන අමාත්‍යාංශයේ ලේකම්වරයා අතර විශේෂ සාකච්ඡාවක් අද (14) පස්වරුවේ අමාත්‍යාංශයේදී පැවැත්වීමට නියමිතය.