කල් ඉකුත් වූ වීසා බලපත්‍ර යටතේ ශ්‍රී ලංකාවේ නීතිවිරෝධී ලෙස රැඳීසිටීම සම්බන්ධයෙන් ආගමන හා විගමන දෙපාර්තමේන්තුවේ විමර්ශන ඒකකයට අනුයුක්ත නිලධාරීන් විසින් ඊයේ (10) දින ඉන්දීය ජාතිකයන් 22 දෙනකු අත්අඩංගුවට ගෙන තිබේ.

රාජගිරිය ප්‍රදේශයේ කාර්යාල සංකීර්ණයකින් මෙම පුද්ගලයන් අත්අඩංගුවට ගෙන ඇත.

නිලධාරීන්ට අනුව, මෙම කණ්ඩායම මාස තුනකට පමණ පෙර මෙරටට පැමිණ තිබේ.

ඔවුන්ගෙන් 17 දෙනෙකු සංචාරක වීසා මතද, 4 දෙනෙකු නේවාසික වීසා මතද, එක් පුද්ගලයෙකු ව්‍යාපාරික වීසා මතද මෙරටට පැමිණ ඇත.

ආගමන විමර්ශන ඒකකය විසින් සැකසහිත ඉන්දියානු ජාතිකයන් දෙදෙනෙකුගෙන් හදිසි ප්‍රශ්න කිරීමකදී අනාවරණය වූ තොරතුරු මත බලධාරීන් මෙම අත්අඩංගුවට ගැනීම් ආරම්භ කර තිබේ.

මෙම පුද්ගලයන් වයස අවුරුදු 25 ත් 35 ත් අතර අය බවට විශ්වාස කෙරේ.

ඔවුන් දැනට මිරිහාන තාවකාලික රැඳවුම් මධ්‍යස්ථානයේ රඳවා සිටින අතර වහාම ශ්‍රී ලංකාවෙන් පිටුවහල් කිරීමට නියමිතය.