2025 වසර අවසන් වීමට පැය කිහිපයක් ඉතිරිව තිබියදීත් දිවයිනේ ප්‍රදේශ දෙකකින් වෙඩි තැබීමේ සිද්ධීන් දෙකක් වාර්තා වූ බව පොලිසිය පවසයි.

ඒ අනුව, එම වසර තුළ දිවයින පුරා වෙඩි තැබීම් සිද්ධීන් 114ක් වාර්තා වී ඇති අතර, එහි ප්‍රතිඵලයක් ලෙස 60 දෙනෙකු මිය ගොස් තවත් 57 දෙනෙකු තුවාල ලබා ඇති බව පොලිස් සංඛ්‍යාලේඛනවලින් හෙළි වේ.

ඊයේ වාර්තා වූ වෙඩි තැබීම් දෙකම සංවිධානාත්මක අපරාධ කල්ලි සාමාජිකයන් විසින් සිදුකරන ලද බව මූලික පොලිස් පරීක්ෂණවලින් පෙනී යයි.

ඊයේ රාත්‍රී 10.30ට පමණ කොහුවල බෝධියවත්ත ප්‍රදේශයේදී එක් වෙඩි තැබීමක් සිදුව තිබිණි.

තුවක්කුකරු යතුරුපැදියකින් පැමිණ නිවසකට වෙඩි තබා පලා ගොස් ඇති බව පොලිසිය පැවසීය.

කෙසේවෙතත්, සැකකරු CCTV දර්ශනවල සටහන් විවී තිබිණි.

සිද්ධියෙන් තුවාල ලැබූ 16 හැවිරිදි දැරියක් දැනට රෝහලේ ප්‍රතිකාර ලබමින් සිටී.

වෙඩික්කරුට අපේක්ෂිත ඉලක්කය වැරදී ඇති බවත්, ඒ වෙනුවට අහම්බෙන් ගැහැණු ළමයාට වෙඩි තබා ඇති බවත් පොලිසිය පැවසීය.

වැඩිදුර පරීක්ෂණවලින් හෙළි වී ඇත්තේ මත්ද්‍රව්‍ය ජාවාරමට සම්බන්ධ පුද්ගලයකු දැරියගේ නිවස අසල පදිංචිව සිටින බවත් ඔහු දැනට බන්ධනාගාරගතව සිටින බවත්ය.

ඔහු ‘බඩෝවිට අසංක’ නායකත්වය දෙන අපරාධ කල්ලියට සම්බන්ධ බවට වාර්තා වේ.

දෙසැම්බර් 22 වැනිදා නුගේගොඩ සිදු වූ මිනීමැරුමකට අදාළ පුද්ගලයා ආධාර සහ අනුබල දුන් බවට ප්‍රතිවාදී අපරාධ කණ්ඩායමකට සම්බන්ධ අවිශ්ක ඒෂාන් නැමැත්තා සැකකර ඇති බව පොලිසිය පැවසීය.

එහි ප්‍රතිඵලයක් ලෙස, ඊයේ සිදු වූ වෙඩි තැබීමේදී ඒෂාන් අදාළ සැකකරුගේ මව සහ මස්සිනා ඉලක්ක කරගත් බව කියනු ලැබේ.

තුවක්කුකරුවන් අදාළ පවුලට වාචිකව චෝදනා කරමින්, “බඩෝවිට අසංකට තොරතුරු දෙන්නේ උඹලා” යනුවෙන් සඳහන් කර ඇති බව වාර්තා වේ.

පොලිසිය තවදුරටත් පැවසුවේ එම පුද්ගලයා මීට පෙර එෂාන්ගේ කණ්ඩායම සමඟ සම්බන්ධ වී ඉන් පිටව ගොස් පසුව බඩෝවිට අසංක වෙත තොරතුරු ලබා දී ඇති බවයි.

මේ අතර, ඊය් (31) උදෑසන කළුතර නාගොඩ ශික්ෂණ රෝහලේදී තවත් වෙඩි තැබීමක් වාර්තා විය.

බන්ධනාගාර නියාමකවරුන්ගේ ආරක්ෂාව යටතේ ප්‍රතිකාර ලබමින් සිටි රැඳවියකුට නාඳුනන තුවක්කුකරුවකු විසින් වෙඩි තබා තිබිණි.

වෙඩි වැදීමෙන් තුවාල ලැබූ පුද්ගලයා දිලිප් චතුරංග හෙවත් ‘රජවත්තේ චතුවා’ ලෙස හඳුනාගෙන ඇති බව පොලිසිය පැවසීය.

ඔහු දෙසැම්බර් 13 වැනිදා මත්ද්‍රව්‍ය සම්බන්ධ චෝදනා මත අත්අඩංගුවට ගෙන අධිකරණයට ඉදිරිපත් කිරීමෙන් පසු රිමාන්ඩ් භාරයට පත්කර ඇත.

රෝහල් ආරංචි මාර්ගවලට අනුව, වින්දිතයා කළුතර බන්ධනාගාරයේ රඳවා සිටි අතර බන්ධනාගාර රැඳවියන් පිරිසක් විසින් පහරදීමෙන් පසු දෙසැම්බර් 29 වැනිදා රෝහල් ගතකර ඇත.

රිවෝල්වරයක් භාවිත කර ඇති තුවක්කුකරු එම ස්ථානයෙන් පලා ගිය බව පොලිසිය පැවසීය.

‘නවීන්’ නායකත්වය දෙන කළුතර පදනම් කරගත් අපරාධ කණ්ඩායමේ සාමාජිකයකු ලෙස වින්දිතයා හඳුනාගෙන ඇත.

වෙඩි තැබීම හේතුවෙන් ඔහුගේ උදර ප්‍රදේශයට තුවාල සිදුවී ඇති බව වාර්තා වේ.