January 20, 2024
නාරම්මල ප්‍රදේශයේ දී පොලිස් නිලධාරියකුගේ වෙඩි වැදීමෙන් මියගිය ලොරි රථ රියදුරාගේ පවුලට ශ්‍රී ලංකා පොලිසිය රුපියල් ලක්ෂ 10ක වන්දියක් ප්‍රදානය කර තිබේ.
වැඩබලන පොලිස්පති දේශබන්දු තෙන්නකෝන් විසින් අදාළ වන්දි මුදල මියගිය රියදුරුගේ අලව්වේ පිහිටි නිවසේදී පෞද්ගලිකව භාර දී ඇත.
බ්‍රහස්පතින්දා රාත්‍රියේ මෙම වෙඩි වැදීම සිදුව ඇත්තේ උප පොලිස් පරීක්ෂකවරයකුගේ ගිනි අවිය වැරදීමකින් ක්‍රියාත්මක වීමෙන් බව ඔහු විසින් ප්‍රකාශ කර ඇතැයි පොලිස් මාධ්‍ය ප්‍රකාශකවරයා පැවසීය.
සිවිල් ඇඳුමෙන් සිටි උප පොලිස් පරීක්ෂකවරයා සහ පොලිස් කොස්තාපල්වරයකු ලොරි රථ රියදුරුට නවත්වන ලෙස සංඥා කළද ඔහු එම නියෝගය නොතකා ක්‍රියාකර ඇති බව පැවසේ.
ඒ අනුව 59 හැවිරිදි උප පොලිස් පරීක්ෂකවරයා සහ කොස්තාපල්වරයකු ස්ථානීය පරීක්ෂණයක් සඳහා ලොරි රථය ලුහුබැඳ ගොස් නවතා ඇති අතර,එම අවස්ථාවේ උප පොලිස් පරීක්ෂකවරයාගේ ගිනි අවිය ක්‍රියාත්මක වී තිබේ.
බරපතළ තුවාල ලැබූ රියදුරු නාරම්මල රෝහලට ඇතුළත් කිරීමෙන් පසුව ඔහු මියගොස් තිබේ.
සිද්ධියට සම්බන්ධ උප පොලිස් පරීක්ෂකවරයා සහ කොස්තාපල්වරයා යන දෙදෙනාම පසුව අත්අඩංගුවට ගත් අතර උප පොලිස් පරීක්ෂකවරයා ජනවාරි 23 දක්වා රක්ෂිත බන්ධනාගාර ගත කිරීමට නාරම්මල මහේස්ත්‍රාත්වරයා නියෝග කළේය.
වැඩිදුර පරීක්ෂණ පැවැත්වෙන තුරු පොලිස් නිලධාරීන් දෙදෙනාගේම රාජකාරි අත්හිටුවා තිබේ.
