යුක්රේනයට එරෙහිව සටන් කිරීමට රුසියානු හමුදාවට බැඳුණු හිටපු ශ්‍රී ලංකා සොල්දාදුවන්ගේ සංඛ්‍යාව වැඩිවීම මධ්‍යයේ, ඔවුන් ආපසු ගෙන්වා ගැනීම සඳහා විදේශ කටයුතු රාජ්‍ය ඇමැති තාරක බාලසූරියගේ ප්‍රධානත්වයෙන් යුත් ශ්‍රී ලංකා දූත පිරිසක් මේ මස අගදී රුසියාවට යෑමට නියමිතව ඇත.

ඒ සඳහා වන කටයුතු අදියර වශයෙන් ක්‍රියාත්මක කිරීමට සැලසුම් කර ඇති බව වාර්තා වේ.

රුසියාවේ හිටපු ශ්‍රී ලංකා තානාපති ආචාර්ය සමන් වීරසිංහ, ආරක්ෂක ලේකම් කමල් ගුණරත්න, පාර්ලිමේන්තු මන්ත්‍රීවරුන් වන දයාසිරි ජයසේකර සහ ගාමිණී වලේබොඩ ගෙන් සමන්විත දූත පිරිස ජූනි 25, 26 සහ 27 යන දිනවල මොස්කව්හිදී රුසියානු ආරක්ෂක බලධාරීන් හමුවීමට නියමිතය.

ඉහළ පෙළේ මූලාශ්‍රයක් ජනමාධ්‍ය වෙත පවසා ඇත්තේ, නැවත ශ්‍රී ලංකාව බලා පැමිණීමට උත්සාහ කරන යුක්‍රේන යුද පෙරමුණේ සිටින එම සොල්දාදුවන්ගෙන් ශ්‍රී ලංකා බලධාරීන්ට බොහෝ දුරකථන ඇමතුම් ලැබෙන බවයි.

ආකර්ශනීය වැටුප් සහ වෙනත් වරප්‍රසාද ලබා දෙන බව විශ්වාස කර මෙම සෙබළුන් රවටා ඇති බව අනාවරණ වී තිබේ.

දෙරට අතර කිසිදු රාජ්‍ය තාන්ත්‍රික ගැටුමකින් තොරව ගැටලුව විසඳා ගැනීමේ පියවරක් ලෙස, සොල්දාදුවන් ඉක්මනින් ආපසු ගෙන්වා ගැනීම සඳහා වන විධිවිධාන සාකච්ඡා කිරීමට රුසියාව ශ්‍රී ලංකා බලධාරීන්ට මෙලෙස නිල සංචාරයක් ලබා දී තිබේ.

රුසියානු කුලී හේවා සමාගම් සඳහා නීති විරෝධී ලෙස බඳවාගැනීමේ නියෝජිතයන් ලෙස කටයුතු කළ විශ්‍රාමික ජෙනරාල්වරුන් දෙදෙනෙකු පොලිසිය විසින් මේවනවිට අත්අඩංගුවට ගෙන තිබේ.

මේ අතර, යුක්රේනයේ ශ්‍රී ලංකා දූත මණ්ඩලයක් නොමැතිවීම රුසියාවට එරෙහිව සටන් කරන ශ්‍රී ලාංකිකයන් පිළිබඳ දත්ත රැස් කිරීමේ ක්‍රියාවලියට බාධාවක් වී තිබේ.

කෙසේවෙතත්, යුක්රේනයට සමගාමීව පිළිගත් තුර්කියේ ශ්‍රී ලංකා තානාපති කාර්යාලය පසුගිය සෙනසුරාදා යුක්රේන විදේශ අමාත්‍යාංශයට ලිපියක් යවා එම යුද පෙරමුණේ සටන් කරන ශ්‍රී ලාංකිකයන් පිළිබඳ විස්තර ඉල්ලා ඇත.

යුක්රේනයේදී රුසියානුවන්ට එරෙහිව සටන් කරමින් සිටියදී එක් ශ්‍රී ලාංකිකයකු මියගිය බව මීට පෙර වාර්තා වූ අතර තොරතුරු නොමැතිකම හේතුවෙන් යුද්ධයට සම්බන්ධ වූවන්ගේ වත්මන් තත්ත්වය තහවුරු කර ගැනීමට ශ්‍රී ලංකා බලධාරීන්ට නොහැකි වී තිබේ.