අධිරුධිර පීඩනය සැළකිව යුතු ලෙස අඩු කළ හැකි ඖෂධයක් කැලණිය විශ්වවිද්‍යාලයේ වෛද්‍ය පීඨයේ සායනික පර්යේෂණ ඒකකය විසින් නිපදවා තිබේ.

සායනික පර්යේෂණ ඒකකයේ අධ්‍යක්ෂ මහාචාර්ය අසිත ද සිල්වා මාධ්‍ය හමුවකදී පැවසුවේ පර්යේෂණය වසර දහයකට පමණ පෙර ආරම්භ වූ බවත් වඩාත් ඵලදායී ප්‍රතිකාර සහ රෝගීන්ගේ පහසුව සඳහා බහුලව භාවිත වන ඖෂධ තුනක් තනි පෙත්තකට ඒකාබද්ධ කිරීම කෙරෙහි මෙහිදී අවධානය යොමුකළ බවත්ය.

“අධිරුධිර පීඩනය සම්පූර්ණයෙන්ම සුවකළ හැකි ඖෂධයක් නැතත්, මෙම නව ඖෂධයට අධි රුධිර පීඩනය ඵලදායී ලෙස පාලනය කළ හැකියි,” මහාචාර්ය ද සිල්වා පැවසීය.

“ඖෂධ තුනක් ඒකාබද්ධ කිරීමෙන් රෝගීන්ට ගන්න වෙන්නේ දිනකට එක් පෙත්තක් පමණයි, එය රෝගීන්ගෙන් 88%ක් තුළ රුධිර පීඩනය පාලනය කරන බව ඔප්පු වී තිබෙනවා.” යැයි ද ඔහු පැවසීය.

2024 දී ඖෂධයට අදාළ පුළුල් සායනික අත්හදා බැලීම් අවසන් කළ බවත්, සොයාගැනීම් ලෝක සෞඛ්‍ය සංවිධානය (WHO) සහ එක්සත් ජනපද ආහාර හා ඖෂධ පරිපාලනය (FDA) වෙත ඉදිරිපත් කළ බවත් ඔහු පැවසීය.

ජුනි මාසයේදී එක්සත් ජනපද ආහාර හා ඖෂධ පරිපාලනය ඖෂධය අනුමත කළ අතර, මෙම වසරේ සැප්තැම්බර් මාසයේදී ලෝක සෞඛ්‍ය සංවිධානය එය ඔවුන්ගේ අත්‍යවශ්‍ය ඖෂධ ලැයිස්තුවට එක් කළේය.

මෙම ඖෂධය භාවිතයෙන් අධි රුධිර පීඩනය සමීපව පාලනය කිරීමෙන් ආඝාත අවදානම 60%කින් පමණ අඩු කර ගත හැකි බව මහාචාර්ය ද සිල්වා තවදුරටත් අවධාරණය කළේය