ත්‍රිකුණාමලය ප්‍රදේශයේ බුද්ධ ප්‍රතිමාවකට අදාළ සිද්ධියක් සම්බන්ධයෙන් පූජ්‍ය බලංගොඩ කස්සප හිමි ඇතුළු බෞද්ධ භික්ෂූන් වහන්සේ සිව්නමක් සහ තවත් පස් දෙනෙකු පෙබරවාරි 02 වැනිදා දක්වා තවදුරටත් රක්ෂිත බන්ධනාගාර ගතකර තිබේ.

ත්‍රිකුණාමලය මහේස්ත්‍රාත් අධිකරණයට අද(28) ඉදිරිපත් කිරීමෙන් පසු එම පිරිස තවදුරටත් රක්ෂිත බන්ධනාගාර ගත කරන ලදී.

පසුගිය වසරේ නොවැම්බර් 16 වැනිදා ත්‍රිකුණාමලයේ විහාරස්ථානයක තැන්පත් කර තිබූ බුද්ධ ප්‍රතිමාවක් ඉවත්කිරීමට ගත් උත්සාහයකින් පසු නොසන්සුන්තාවක් ඇති විය.

කෙසේවෙතත්, මෙම සිද්ධිය සම්බන්ධයෙන් වෙරළ සංරක්ෂණ දෙපාර්තමේන්තුව පොලිසියට පැමිණිල්ලක් ඉදිරිපත් කරමින් කියා සිටියේ ඉදිකිරීම් අනවසර බව සහ පිළිමය ඉවත්කිරීමට ගත් උත්සාහයන්හිදී භික්ෂූන් වහන්සේ සහ ප්‍රදේශවාසීන්ගෙන් දැඩි විරෝධයක් එල්ල වූ බවයි.

ත්‍රිකුණාමලය මහේස්ත්‍රාත් අධිකරණයේ විභාග වන නඩුවට අදාළ පාර්ශ්ව කැඳවා, ත්‍රිකුණාමලය බෝධිරාජ විහාරයේ බුද්ධ ප්‍රතිමාවක් ස්ථානගත කිරීමෙන් වෙරළ සංරක්ෂණ නීති උල්ලංඝනය කිරීමේ චෝදනා මත ඔවුන් රක්ෂිත බන්ධනාගාර ගතකරන ලෙස අධිකරණය නියෝග කළේය.