මැයි 16 වන දින වැලිගම නගරයෙන් පිටත ස්ථානයක රැඳවියකු සහ ඔහුගේ පවුලේ සාමාජිකයන් සමඟ බන්ධනාගාරයට අයත් බස් රථයක් නවතා තැබීමේ සිද්ධියක් සම්බන්ධයෙන් පරීක්ෂණයක් පැවැත්වෙන තෙක් අඟුණකොළපැලැස්ස බන්ධනාගාරයට අනුයුක්ත ජේලර්වරුන් දෙදෙනෙකු සහ බන්ධනාගාර රියදුරකුගේ වැඩ තහනම් කර තිබේ.

බන්ධනාගාර මාධ්‍ය ප්‍රකාශක ගාමිණී බී. දිසානායක පැවසුවේ, අදාළ බන්ධනාගාර බස් රථය වැලිගම දුම්රිය ස්ථානය අසල රැඳවියෙකු සමඟ නවතා තිබූ බවයි.

පසුව බස් රථයේ ආරක්ෂාවට සිටි බන්ධනාගාර නිලධාරීන් එම රැඳවියා බස් රථයේ දමා ගොස් ඔවුන්ගේ පෞද්ගලික අවශ්‍යතා සඳහා භාණ්ඩ මිලදී ගැනීමට වැලිගම නගරයේ වෙළඳසැලකට ගොස් තිබේ.

ඉන්පසු ටික වේලාවකට පසු බස් රථය එම ස්ථානයෙන් පිටව ගොස් ඇති බව ගාමිණි දිසානායක වැඩිදුරටත් සඳහන් කරයි.

ඒ අවස්ථාවේ බන්ධනාගාර බස් රථය තුළ කාන්තාවක් සහ කුඩා දරුවෙකු සිටිනු දක්නට ලැබුණු බවද වාර්තාවී තිබේ.

සිදුකරන ලද පරීක්ෂණවලදී, මෙම බස් රථය අඟුණකොළපැලැස්ස බන්ධනාගාරයට අයත් බවත්, බන්ධනාගාරයේ සිට කරාපිටිය රෝහලේ සායනයකට රැඳවියකු රැගෙන ගොස් ආපසු යමින් සිටියදී වැලිගම නගරයෙන් පිටත ස්ථානයක බස් රථය නවතා ඇති බවත් අනාවරණය වී තිබේ.

අදාළ බස් රථය තුළ සිටි දරුවා සහ කාන්තාව රැඳවියාගේ පවුලේ සාමාජිකයන් බව තවදුරටත් අනාවරණය වී ඇත.

පවුලේ සාමාජිකයන් බස් රථයට නැගීමෙන් පසු බන්ධනාගාර නිලධාරීන් පිටව ගොස් ඇත්දැයි සොයාබැලීම සඳහා සීසීටීවී දර්ශන සහ බුද්ධි නිලධාරීන්ගේ සහාය ඇතිව වැඩිදුර පරීක්ෂණ පවත්වන බව බන්ධනාගාර මාධ්‍ය ප්‍රකාශකවරයා සඳහන් කරයි.