දිවයින පුරා ගුරුවරුන් 40,000 ක හිඟයක් පැවතීම හේතුවෙන් මෙම වසර අවසන් වනවිට නිශ්චිත සංඛ්‍යාවක් බඳවා ගැනීමට රජය අපේක්ෂා කරන බව අග්‍රාමාත්‍ය ආචාර්ය හරිනි අමරසූරිය පාර්ලිමේන්තුවේදී ප්‍රකාශ කළාය.

විපක්ෂ මන්ත්‍රී මුජිබර් රහුමාන් මතුකළ ප්‍රශ්නයකට පිළිතුරු දෙමින් අග්‍රාමාත්‍යවරිය මෙම අදහස් දැක්වීය.

බස්නාහිර පළාතේ පමණක් රජයේ පාසල්වල 1 සිට 5 ශ්‍රේණි දක්වා සිංහල මාධ්‍ය ගුරු පුරප්පාඩු 1,310 ක්ද, දෙමළ මාධ්‍ය ගුරු පුරප්පාඩු 302 ක්ද, 6 සිට 11 ශ්‍රේණි දක්වා සිංහල මාධ්‍ය ගුරු පුරප්පාඩු 1,325 ක් සහ දෙමළ මාධ්‍ය ගුරු පුරප්පාඩු 397 ක් පවතී. සමස්තයක් වශයෙන්, රට පුරා ගුරු පුරප්පාඩු 40,000 ක් පවතින බව ඇය පවසයි.

රජයේ පාසල්වල 1 සිට 5 ශ්‍රේණි දක්වා සිංහල මාධ්‍ය ගුරු පුරප්පාඩු 4,240 ක්ද, දෙමළ මාධ්‍ය ගුරු පුරප්පාඩු 2,827 ක්ද, දැනට පවතින අතර, 6 සිට 11 ශ්‍රේණි දක්වා සිංහල මාධ්‍ය ගුරු පුරප්පාඩු සංඛ්‍යාව 11,274 ක් සහ දෙමළ මාධ්‍ය ගුරු පුරප්පාඩු 6,121 බව අග්‍රාමාත්‍යවරිය වැඩිදුරටත් සඳහන් කළාය.

දැනට ගුරු වෘත්තියට උපාධිධාරීන් බඳවාගැනීම සම්බන්ධයෙන් අධිකරණය හමුවේ නඩුවක් පවතින අතර, පවතින ගුරු පුරප්පාඩු පිරවීම සඳහා උපාධිධාරීන් බඳවාගැනීම පිළිබඳව අවධානය යොමුකරන බව ඇය ප්‍රකාශ කරයි.

කෙසේවෙතත්, මෙම වසර අවසන් වනවිට අවශ්‍ය පුරප්පාඩුවලින් අවම වශයෙන් නිශ්චිත සංඛ්‍යාවක් පිරවීමට රජය අපේක්ෂා කරන බවද අග්‍රාමාත්‍යවරිය සඳහන් කළාය.

අධ්‍යාපන අමාත්‍යාංශයේ පුරප්පාඩු පිරවීම සඳහා බඳවාගැනීම් විභාග පාදක ක්‍රියාවලියක් හරහා සිදුකළ යුතු බවට රාජ්‍ය සේවා කොමිෂන් සභාව නිර්දේශයක් නිකුත් කර ඇති බවද ඇය පෙන්වාදී තිබේ.