වසර 20ක් තුළ මෙරට දරුවන්ගේ අධික බර තුන්ගුණයකින් වැඩි වී ඇති බවත්, දරුවන්ට සෞඛ්‍යයට හානි කරන පරිසර නොව සෞඛ්‍ය සම්පන්න ආහාර සහිත පරිසර ලැබිය යුතු බවත් එක්සත් ජාතීන්ගේ ළමා අරමුදල (UNICEF) පවසයි.

පසුගිය දශක දෙක තුළ අධික බර අවම වශයෙන් තුන්ගුණයකින් වැඩි වී ඇති රටවල් කාණ්ඩය අතර ශ්‍රී ලංකාව ද සිටින බව යුනිසෙෆ් සිය නවතම වාර්තාව නිකුත් කරමින් පවසා තිබේ.

එම වාර්තාවට අනුව, ගෝලීය වශයෙන්, වයස අවුරුදු 5ට අඩු දරුවන් විසිදෙනකුගෙන් එක් අයකු සහ අවුරුදු 5-19 අතර ළමුන් සහ නව යොවුන් වියේ පසුවන දරුවන් පස්දෙනෙකුගෙන් එක් අයෙකු අධික බර සහිතව සිටියි.

‘Feeding Profit: How food environments are failing children’ නමැති 2025 ළමා පෝෂණ වාර්තාව, ලොව පුරා ළමුන් හා නව යොවුන් වියේ දරුවන් තුළ අධික බර හා තරබාරුකම වැඩිවීමට සෞඛ්‍ය සම්පන්න නොවන ආහාර පරිසරයන් දායක වන ආකාරය හෙළිකරයි.

අසාමාන්‍ය ප්‍රගතියක් ලබා ඇති රටවල මෑත කාලීන උදාහරණ වලින් උපුටා දක්වමින් එම වාර්තාව දරුවන්ගේ ආහාර පරිසරයන් පරිවර්තනය කිරීම සඳහා නිර්දේශ අටක් ඉදිරිපත් කරයි. එනම්:

– මව්කිරි දීම සහ සුදුසු අනුපූරක පෝෂණය ආරක්ෂා කිරීම සහ ප්‍රවර්ධනය කිරීම සඳහා ජාත්‍යන්තර මව්කිරි ආදේශක අලෙවිකරණ සංග්‍රහය සහ පසුව ලෝක සෞඛ්‍ය සභා යෝජනා ක්‍රියාත්මක කිරීම.

– ආහාර පරිසරයන් පරිවර්තනය කිරීම සඳහා පුළුල්, අනිවාර්ය පියවර ක්‍රියාත්මක කිරීම (පාසල් ආහාර පරිසරයන්, ආහාර අලෙවිකරණ සීමාවන්, ආහාර ලේබල් කිරීම, සෞඛ්‍යයට අහිතකර ආහාර සහ පාන වර්ග සඳහා බදු සහ ආහාර ප්‍රතිසංස්කරණය).

– ළමුන් සහ නව යොවුන් වියේ දරුවන් සඳහා දේශීයව නිපදවන පෝෂ්‍යදායී ආහාර ලබා ගැනීමේ හැකියාව සහ දැරිය හැකි මිල වැඩි දියුණු කිරීම සඳහා පුළුල් ප්‍රතිපත්ති ක්‍රියාත්මක කිරීම.

– අතිශයින් සැකසූ ආහාර කර්මාන්තයේ මැදිහත්වීම් වලින් රාජ්‍ය ප්‍රතිපත්ති ක්‍රියාවලීන් ආරක්ෂා කිරීම සඳහා ශක්තිමත් ආරක්ෂණ ක්‍රම ස්ථාපිත කිරීම.

– සෞඛ්‍ය සම්පන්න ආහාර පරිසරයක් සඳහා ඔවුන්ගේ අයිතිය ඉල්ලා සිටීමට පවුල් සහ ප්‍රජාවන් බලගන්වන සමාජීය සහ හැසිරීම් වෙනස් කිරීමේ මුලපිරීම් ක්‍රියාත්මක කිරීම.

– ආදායම් දරිද්‍රතාවය ආමන්ත්‍රණය කිරීම සහ පෝෂ්‍යදායී සහ සෞඛ්‍ය සම්පන්න ආහාර වේලට දරුවන්ගේ ප්‍රවේශය වැඩි කිරීම සඳහා සමාජ ආරක්ෂණ වැඩසටහන් ශක්තිමත් කිරීම.

– තරුණයන් විසින් මෙහෙයවනු ලබන උපදේශනය පෝෂණය කිරීමෙන් ආහාර යුක්තිය පිළිබඳ පොදු ප්‍රතිපත්ති සම්පාදනයට තරුණයින් සම්බන්ධ කර ගන්න.

– ළමුන් සහ නව යොවුන් වියේ දරුවන් අතර ආහාර පරිසරයන්, ආහාර වේල් සහ අධික බර නිරීක්ෂණය කිරීම සඳහා ගෝලීය සහ ජාතික දත්ත සහ නිරීක්ෂණ පද්ධති ශක්තිමත් කිරීම.