May 11, 2025
සබරගමුව විශ්වවිද්‍යාලයේ දැඩි නවකවධයට ලක් වූ බවට සැළකෙන චරිත් ඩිල්ෂාන් සිසුවාගේ මරණය සම්බන්ධයෙන් පරීක්ෂණ අඛණ්ඩව සිදුවෙමින් පවතී.
පොලිස් මාධ්‍ය අංශයට අනුව, ඒ සම්බන්ධයෙන් මේ දක්වා අත්අඩංගුවට ගැනීම් 10ක් සිදු කර ඇත.
සැකකරුවන්ගෙන් හතර දෙනෙකු පසුගිය සඳුදා අත්අඩංගුවට ගෙන බලංගොඩ මහේස්ත්‍රාත් අධිකරණයට ඉදිරිපත් කරන ලද අතර, තවත් හය දෙනෙකු අත්අඩංගුවට ගෙන අඟහරුවාදා අධිකරණයට ඉදිරිපත් කර තිබේ.
සබරගමුව විශ්වවිද්‍යාලයේ තුන්වැනි වසරේ සිසුන් වන සැකකරුවන් මැයි 16 වැනි දින ඔවුන්ගේ ඊළඟ නඩු දිනය දක්වා රක්ෂිත බන්ධනාගාරගත කර ඇත.
සිසුන් අත්අඩංගුවට ගත් නිශ්චිත විධිවිධාන පොලිස් මාධ්‍ය අංශයට පැහැදිලි කළ නොහැකි විය.
විශ්වවිද්‍යාලයේ විනය පරීක්ෂණයක් ද වෙන වෙනම සිදුවෙමින් පවතින බව සබරගමුව උපකුලපති මහාචාර්ය සුනිල් ශාන්ත පැවසීය.
“විධිමත් පරීක්ෂණයක් පැවැත්වෙන තුරු අපි සිසුන් 11 දෙනෙකුගේ පන්ති තහනම් කර තිබෙනවා. වෙනත් සිසුන් වෙත නවක වදය ලබා දුන් බවට චෝදනා එල්ල වී ඇති තවත් සිසුන් පස් දෙනෙකුගේ පන්ති තහනම් කර තිබෙනවා.නීතිපති දෙපාර්තමේන්තුව ද මෙම ගැටලුව වටා ඇති නීතිමය කටයුතුවලට සම්බන්ධ වෙමින් සිටින අතර, අපි ඒ සම්බන්ධයෙන් ද සාකච්ඡාවක යෙදී සිටිනවා.” යනුවෙන් ඔහු පැවසීය.
විශ්වවිද්‍යාල ප්‍රතිපාදන කොමිෂන් සභාවේ පසුගිය සතියේ තීරණයට අනුව විශ්වවිද්‍යාල කවුන්සිලයෙන් පත් කිරීමට නියමිත නිලධාරියා තවමත් තීරණය කර නොමැති බව ද ඔහු පැවසීය.
මේ මොහොතේ, පීඨාධිපතිවරුන්, මාෂල්වරුන් සහ ප්‍රොක්ටර්වරු සිසුන්ගේ සුභසාධනය සම්බන්ධයෙන් වඩාත් සුපරීක්ෂාකාරීව කටයුතු කරමින් සිටිති.
අගමැතිනි ආචාර්ය හරිනි අමරසූරිය ද රාජ්‍ය විශ්වවිද්‍යාලවල උපකුලපතිවරුන් හමු වී තිබිණි.
“විවිධ විශ්වවිද්‍යාලවලට විවිධ ගැටලු තිබෙනවා. ඒවා සාමාන්‍යකරණය කළ නොහැකි බැවින් අපි රැස්වීමේදී නවකවධය පිළිබඳ වත්මන් ස්ථාවරය සමාලෝචනයකළ,” යනුවෙන් අධ්‍යාපන අමාත්‍යාංශයේ ලේකම් නාලක කළුවැව පැවසීය.
බොහෝ සංකීර්ණතා හඳුනාගෙන තිබුණද, ප්‍රධාන ගැටලුව වී ඇත්තේ විශ්වවිද්‍යාල ප්‍රතිපාදන කොමිෂන් සභාවේ 919 චක්‍රලේඛය බවත්, එය නවක වධය අවසන් කිරීම සඳහා ප්‍රොටෝකෝලයක් ගෙනහැර දක්වන බවත්, එය උපකුලපතිවරුන්ට අනුගමනය කළ හැකි එකම ක්‍රියාපටිපාටි දළ සටහන බවත් ඔහු සඳහන් කළේය.
“මෙම චක්‍රලේඛය වැරදිකරුගේ ආරක්ෂාව සඳහා වැඩි අවධානයක් යොමු කරන අතර විමර්ශනවලට බාධා කරන තරමක් ප්‍රායෝගික නොවන සීමාවන් පනවනවා, එබැවින් එය වහාම සමාලෝචනය කරන ලෙස අපි විශ්වවිද්‍යාල ප්‍රතිපාදන කොමිෂන් සභාවවෙත උපදෙස් දී තිබෙනවා.” යැයි ඔහු පැවසීය.
විශ්වවිද්‍යාල ප්‍රතිපාදන කොමිෂන් සභාව කියා සිටින්නේ තමන් නවක වධය වැළැක්වීම වෙනුවෙන් පැමිණිලි සඳහා ක්ෂණික ඇමතුම් අංකයක් පවත්වාගෙන යන බවයි.
පසුගිය සතිය පුරා ශිෂ්‍ය සුභසාධනය සඳහා ලබා දී ඇති එම අංකයට ද කතා කළ නමුත් නිලධාරියකු සම්බන්ධ කර ගැනීමට නොහැකි වූ බව සන්ඩේ ටයිම්ස් පුවත්පත වාර්තා කර තිබේ.
කළුවැව ගැටලුව පිළිගත්ත ද තමාට විශ්වවිද්‍යාල ප්‍රතිපාදන කොමිෂන් සභාව වෙනුවෙන් කතා කළ නොහැකි බව සඳහන් කරයි.
” ක්ෂණික ඇමතුම් අංකය කාර්යාල වේලාවන් තුළ පමණක් ක්‍රියාත්මකයි, එය පැය 24 පුරාම සක්‍රිය කරන ලෙස විශ්වවිද්‍යාල ප්‍රතිපාදන කොමිෂන් සභාවෙන් අපි ඉල්ලා තිබෙනවා” යනුවෙන් ඔහු පැවසීය
මේ අතර, ශ්‍රී ජයවර්ධනපුර විශ්වවිද්‍යාලයේ තුන්වැනි වසරේ සිසුවකුට හිස්වැසුම්වලින් පහර දීම සම්බන්ධයෙන් සැකකරුවන් හය දෙනෙකු අඟහරුවාදා අත්අඩංගුවට ගන්නා ලද අතර සිසුවා රෝහල් ගත කර සිටී.
ප්‍රහාරයට හේතුව පැහැදිලි කිරීමට පොලිස් මාධ්‍ය ඒකකයට නොහැකි වූ අතර එය නවක වධය ලෙස සැළකීමට පසුබට වී තිබුණේ සිද්ධියට ජ්‍යෙෂ්ඨ ශිෂ්‍යයකු සම්බන්ධ බැවිනි.
