තහනම ඉවත් කිරීමෙන් පසු ශ්‍රී ලංකාවට ආනයනය කරන වාහන දින 90ක් ඇතුළත ලියාපදිංචි කළ යුතු අතර, එසේ නොකළහොත් ලියාපදිංචි නොකළ වාහන සඳහා 3%ක දඩයක් නියම කරනු ලබන අතර, එය උපරිමය 45%ක් දක්වා විය හැකි බවත් මුදල් අමාත්‍යාංශය පවසයි.

මුදල් අමාත්‍යාංශයේ නිලධාරීන් මේ බව පාර්ලිමේන්තු මන්ත්‍රී හර්ෂ ද සිල්වාගේ ප්‍රධානත්වයෙන් පාර්ලිමේන්තුවේදී රැස්වූ රාජ්‍ය මුදල් පිළිබඳ කාරක සභාවට දැනුම් දී තිබිණි.

විශේෂයෙන් ඕනෑම ආනයනකරුවෙකු විසින් ආනයනය කරන ලද මුළු වාහන සංඛ්‍යාවෙන් 25%ක් මාස 6ක් ඇතුළත ලියාපදිංචි නොකළහොත් ආනයනය පිළිබඳ එකඟතාව අත්හිටුවන බව ද ඔවුන් පවසා තිබේ.

මුදල්, සැලසුම් සහ ආර්ථික සංවර්ධන අමාත්‍යාංශය නියෝජනය කරන නිලධාරීන් පැවසුවේ, යම් යම් කොන්දේසි යටතේ වාහන ආනයනයට අවසර දී ඇති බවත්, සාමාන්‍ය ආර්ථික ක්‍රියාකාරකම් පුනර්ජීවනය කිරීම දිරිමත් කිරීම සහ රටේ ආර්ථික ස්ථාවරත්වය ආරක්ෂා කිරීම සඳහා වාහන ආනයනය සම්බන්ධයෙන් මෙම කොන්දේසි පනවා ඇති බවත්, විදේශ විනිමය සංචිත ආරක්ෂා කිරීම, අතිරික්ත වාහන සංඛ්‍යාවක් ආනයනය කිරීම අධෛර්යමත් කිරීම සහ අනවශ්‍ය මෝටර් රථ තොග වළක්වාගැනීම යන කරුණු සැලකිල්ලට ගනිමින් කටයුතු කරන බවත්ය.

පුද්ගලික අවශ්‍යතා මත වාහන ආනයනය කිරීමට කැමති නම්, එක් වාහනයක් පමණක් ආනයනය කළ හැකි බවත්, වෙළෙන්දෙකුට එවැනි කොන්දේසියක් නොමැති බවත් අමාත්‍යාංශ නිලධාරීහු ප්‍රකාශ කළහ.