රුපියල් මිලියන 10 ක් වටිනා විදේශීය දුම්වැටි සහ විස්කි තොගයක් සමඟ 45 හැවිරිදි ව්‍යාපාරිකයකු අද පෙරවරුවේ බණ්ඩාරනායක අන්තර්ජාති ගුවන් තොටුපොළේදී ගුවන්තොටුපොළ පොලිසිය විසින් අත්අඩංගුවට ගෙන තිබේ.

සැකකරු කොළඹ 14 වේල්ස් ප්‍රින්ස් පාරේ පදිංචිකරුවකු වන අතර ඔහු ව්‍යාපාරික කටයුතු සඳහා නිතර ගුවන් ගමන්වල නිරත වන අයකු බව ද අනාවරණ වී තිබේ.

සැකකාර ව්‍යාපාරිකයා අද අලුයම 3.50 ට ඉන්දියාවේ බැංගලෝර් සිට පැමිණි ඉන්ඩිගෝ ගුවන් සේවයට අයත් 6E-1164 දරන ගුවන් යානයෙන් කටුනායක ගුවන් තොටුපළ වෙත පැමිණ ඇත.

සැකකරු සතුව තිබූ ගමන් මළු පහක් තුළ විදේශීය රටවල නිෂ්පාදිත දුම්වැටි සඟවා තිබූ බව පොලිසිය පවසයි.

මීට අමතරව, එක් ගමන් මල්ලක ආනයනය කරන ලද මධ්‍යසාර සන්නාම සහිත බෝතල් 125ක් ද සඟවා තිබියදී සොයාගෙන තිබේ.

මෙම භාණ්ඩ එළැඹෙන උත්සව සමයේදී ශ්‍රී ලංකාවේ විවිධ පළාත්වල මත්පැන් අලෙවිසැල් සහ ආපනශාලාවල විකිණීමට සැලසුම් කර තිබූ බව ද අනාවරණ වූ බව පොලිසිය සදහන් කරයි.

නීතිවිරෝධී ලෙස භාණ්ඩ ආනයනය කිරීම සම්බන්ධයෙන් ව්‍යාපාරිකයාට චෝදනා එල්ල වී ඇති අතර, ඔහු අද පස්වරුවේ අධිකරණය හමුවට ඉදිරිපත් කිරීමට නියමිතය.

සිද්ධිය සම්බන්ධයෙන් කටුනායක පොලිසියේ ස්ථානාධිපතිවරයාගේ අධීක්‍ෂණය සහ මඟපෙන්වීම යටතේ වැඩිදුර පරීක්‍ෂණ පැවැත්වේ.