January 12, 2025
විශාල ඒකාබද්ධ බලාගාර දෙකකට බලය සැපයීම සඳහා සහ ඊට වැයවන පිරිවැය අඩු කර ගැනීමේ අරමුණින් ද්‍රව ස්වාභාවික වායු පර්යන්තයක් වෙනුවෙන් දැනට අත්හිටුවා ඇති ටෙන්ඩරයක් නැවත සක්‍රිය කිරීමට කටයුතු කරන බව බලශක්ති ඇමැති කුමාර ජයකොඩි පවසයි.
“අපට විශේෂයෙන් LNGවලින් ක්‍රියාත්මක වීමට නියමිත බලාගාර දෙකක් තිබෙනවා, නමුත් ඒවා මේ මොහොතේ ද්‍රව ඉන්ධනවලින් ක්‍රියාත්මක වන්නේ. එය මිල අධිකයි” යනුවෙන් ඇමැතිවරයා පාර්ලිමේන්තුව හමුවේ සඳහන් කළේය.
නිව් ෆෝට්‍රස් එනර්ජි නම් සමාගම විසින් ඉල්ලා නොසිටි ගනුදෙනුවක් කරළියට පැමිණි බැවින් ගෝඨාභය රාජපක්ෂ පරිපාලනය යටතේ අන්තර්ජාතික තරඟකාරී ටෙන්ඩරය හදිසියේම අත්හිටුවන ලදී.
මෙරට පුනර්ජනනීය බලශක්ති කොටස වැඩි කර ගැනීමට අවශ්‍ය බැවින් ශ්‍රී ලංකාව ‘සංක්‍රාන්ති බලශක්තියක්’ ලෙස LNG භාවිත කරන බව ඇමැති ජයකොඩි පැවසීය.
“LNG ලාභම නැහැ, නමුත් සාපේක්ෂව එය ද්‍රව ඉන්ධන සහ ඩීසල්වලට වඩා ලාභයි,” යනුවෙන් ඇමැති ජයකොඩි පැවසීය.
ලාභම තාප ප්‍රභවය ගල් අඟුරු වන අතර තවදුරටත් ගල් අඟුරු බලාගාර පිහිටුවන්නේ නැති බව ශ්‍රී ලංකාව පවසා ඇත.
ලංකා විදුලිබල මණ්ඩලයේ දිගුකාලීන ජනන සැලැස්ම යටතේ දෙවැනි ගල් අඟුරු බලාගාරයක් ඉදිකිරීමට ගත් උත්සාහයන් පසුගිය දශකය තුළ විවිධ හේතුන් නිසා අඩාල වී ඇති අතර, එය විදුලි මිල ඉහළ යෑමට හේතු වී තිබේ.
