2014 දී වලස්මුල්ල ප්‍රදේශයේදී සිදු කරන ලද අත්අඩංගුවට ගැනීමකදී, යෙහෝවාගේ සාක්ෂිකරුවන්ගේ ක්‍රිස්තියානි සභාවට අනුබද්ධ කාන්තාවන් සිව්දෙනෙකුගේ මූලික අයිතිවාසිකම් පොලීසිය විසින් උල්ලංඝනය කර ඇති බව ශ්‍රේෂ්ඨාධිකරණය තීන්දු කර තිබේ.

කඩවත පදනම් කරගත් යෙහෝවාගේ සාක්ෂිකරුවන්ගේ ප්‍රජාවේ සාමාජිකාවන් සිව්දෙනෙකු වන පෙත්සම්කරුවන්, 2014 ඔක්තෝබර් 29 වැනි දින පොදු ප්‍රවාහන සේවයෙන් වලස්මුල්ල, කිරම වෙත ගොස් ආගමික ප්‍රජා සේවයක නිරත වී ඇත.

එහිදී ‘මූල්‍යමය වාසි’ සඳහා ඔවුන්ගේ ආගම ‘පතුරුවා හැරීමට’ උත්සාහ කළ බවට වන චෝදනා මත වලස්මුල්ල පොලිසිය විසින් ඔවුන් අත්අඩංගුවට ගෙන තිබේ.

තීන්දුව ප්‍රකාශයට පත් කරමින්, වලස්මුල්ල පොලිස් ස්ථානයේ හිටපු ස්ථානාධිපති වන S.J.B. සුවාරිස් විසින් නීතිය ඉදිරියේ සමානාත්මතාවය, වෙනස්කම් කිරීමෙන් නිදහස සහ අත්තනෝමතික අත්අඩංගුවට ගැනීම්වලින් ආරක්ෂාව සහතික කරන ආණ්ඩුක්‍රම ව්‍යවස්ථාවේ 12(1), 12(2) සහ 13(1) වගන්ති යටතේ පෙත්සම්කරුවන්ගේ මූලික අයිතිවාසිකම් උල්ලංඝනය කර ඇති බව ශ්‍රේෂ්ඨාධිකරණය තීරණය කළේය.

පෙත්සම්කරුවන් හතර දෙනාටම රුපියල් 50,000 බැගින් වන්දි ගෙවන ලෙස ද අධිකරණය නියෝග කළේය.

ඊට අමතරව, ව්‍යවස්ථානුකූලව සුරක්ෂිත කර ඇති නිදහස ආරක්ෂා කිරීමට නීතිය ක්‍රියාත්මක කරන ආයතන පුළුල් ලෙස අසමත් වීම පිළිගනිමින්, එක් එක් පෙත්සම්කරුට රුපියල් 25,000 බැගින් ගෙවීමට රජයට ද නියෝග කරන ලදී.

බුදුරජාණන් වහන්සේගේ පළමු දේශනාව වන ධම්මචක්කප්පවත්තන සූත්‍රය ගැන සඳහන් කරමින්, බුද්ධාගම විශ්වීය ආගමක් බවට පත් වූයේ බලහත්කාරයෙන් නොව, එහි අනුගාමිකයන් විසින් සාමකාමීව ධර්මය ව්‍යාප්ත කිරීම හරහා බව විනිසුරු ජනක් ද සිල්වා සඳහන් කළේය.

“අනෙකුත් ආගම්වල අනුගාමිකයන් ගම්වැසියන් සහ පොලිසිය පෙත්සම්කරුවන්ගේ හැසිරීමට ප්‍රතිචාර දැක්වූ ආකාරයටම ප්‍රතිචාර දැක්වූවා නම් ඇත්ත වශයෙන්ම, බුදුන් වහන්සේගේ ඉගැන්වීම්වල ප්‍රතිලාභ ලෝකයට නොලැබෙන්නට ඉඩ තිබුණා,” යනුවෙන් ඔහු පැවසුවේ.

විනිසුරු ජනක් ද සිල්වා මෙම තීන්දුව ලබා දුන්නේ ශ්‍රේෂ්ඨාධිකරණ විනිසුරුවරුන් වන ගාමිණී අමරසේකර සහ කුමුදිනි වික්‍රමසිංහ යන මහත්වරුන්ගේ එකඟතාවෙනි.

පෙත්සම්කරුවන් වෙනුවෙන් පුලස්ති හේවාමාන්න සමඟ ජනාධිපති නීතිඥ සාලිය පීරිස් පෙනී සිටි අතර වගඋත්තරකරුවන් වෙනුවෙන් නියෝජ්‍ය සොලිසිටර් ජනරාල් ගංගා වාකිෂ්ඨ ආරච්චි පෙනී සිටියය.