මහනුවර තලාතුඔය පොලිස් ස්ථානයේ නිලධාරීන් දෙදෙනෙකු විසින් ලොරි රියදුරකුගේ මූලික අයිතිවාසිකම් උල්ලංඝනය කර ඇති බවට ශ්‍රේෂ්ඨාධිකරණය තීන්දු කර තිබේ.

පොලිස් ප්‍රචණ්ඩත්වය හෙළා දකිමින් තීන්දුවේ සඳහන් කර ඇත්තේ පොලිස් කෲරත්වය පිළිබඳ පද්ධතිමය ගැටලුව කඩිනමින් විසඳීමට රජයට කාලය පැමිණ ඇති බවයි.

විනිසුරු අර්ජුන ඔබේසේකර විසින් ලබා දුන් තීන්දුවට එකඟ වෙමින්, ප්‍රියන්ත ප්‍රනාන්දු සහ සම්පත් විජේරත්න යන විනිසුරුවරුන්ගෙන් සමන්විත ත්‍රිපුද්ගල විනිසුරු මඩුල්ලක් මගින් මෙම තීන්දුව ලබා දී තිබිණි.

ආණ්ඩුක්‍රම ව්‍යවස්ථාවේ 11 සහ 12(1) වගන්ති යටතේ සහතික කර ඇති පෙත්සම්කරුගේ අයිතිවාසිකම් පොලිස් නිලධාරීන් දෙදෙනෙකු විසින් සිදු කරන ලද පහරදීම්, වධහිංසා පැමිණවීම් සහ අමානුෂික සැළකීම් මගින් උල්ලංඝනය කර ඇති බව තීන්දුවේ සඳහන් කර ඇත.

“මෙම අධිකරණය නැවත නැවතත් ප්‍රකාශ කර ඇත්තේ කුමන ස්වරූපයෙන් සහ කුමන මට්ටමකින් වුවද පොලිස් කෲරත්වය නතර කළ යුතු බවයි. අවාසනාවකට මෙන්, මෙම අධිකරණය විසින් ප්‍රකාශ කරන ලද තීන්දු පොලිස්පතිවරයා සහ ජාතික පොලිස් කොමිසම යන දෙපාර්ශ්වයේම සවනට ගිහින් නැහැ. එමනිසා රජය මැදිහත් වී, පොලිස් කෲරත්වයට හේතු පරීක්ෂා කර පියවර ගැනීමට කාලය පැමිණ තිබෙනවා,” විනිසුරු ඔබේසේකර සඳහන් කළේය.

නීතිය ක්‍රියාත්මක කරන්නන් විසින් ප්‍රචණ්ඩත්වය භාවිත කිරීම සහ අවමන් සහගත ලෙස සැළකීම කිසිදු තත්වයක් යටතේ ඉවසිය නොහැකි බව අධිකරණය තවදුරටත් සඳහන් කළේය.

“යම් පුද්ගලයකු වරදක් කර ඇත්නම්, එම පුද්ගලයා නීතියට අනුව අත්අඩංගුවට ගෙන මහේස්ත්‍රාත්වරයකු වෙත ඉදිරිපත් කළ යුතුයි, නීතිමය ක්‍රියාමාර්ග ඒ අනුව සිදුවිය යුතුයි. අත්අඩංගුවට ගැනීමට හේතු වන තත්ත්වයන් කුමක් වුවත්, සෑම පුරවැසියකුටම මනුෂ්‍යයකු ලෙස ගෞරවයෙන් සැළකීමට අයිතියක් තිබේ,” යනුවෙන් තීන්දුවේ සඳහන් වේ.

මෙම පෙත්සම ගොනුකර තිබුණේ මහනුවර දිස්ත්‍රික්කයේ 46 හැවිරිදි ලොරි රථ රියදුරකු විසිනි.

රණවීර නම් පොලිස් නිලධාරියකුට අයත් ටිපර් ට්‍රක් රථයකින් මහියංගනයේ සිට වැලි ප්‍රවාහනය කිරීම සඳහා ඔහු යොදවා සිට ඇත.

2019 පෙබරවාරි 26 වැනිදා, එම වාහනයේ බලපත්‍රයක් නොමැතිව වැලි ප්‍රවාහනය කිරීම සම්බන්ධයෙන් ඔහුට මහියංගනය මහේස්ත්‍රාත් අධිකරණය හමුවේ චෝදනා එල්ල විය.

චෝදනාවෙන් පසුව, පෙත්සම්කරු රණවීරට දැනුම් දී ඇත්තේ නීත්‍යනුකූලව අවශ්‍ය බලපත්‍රයක් නොමැතිව තවදුරටත් වැලි ප්‍රවාහනය නොකරන බවයි.

මෙය රණවීර කෝපයට පත් කර තිබේ.

2019 අප්‍රේල් 1 වැනිදා, ට්‍රක් රථය අලුත්වැඩියා කිරීම සඳහා රැගෙන ගොස් සවස 5.45ට පමණ පැමිණි පසු, පෙත්සම්කරු තම නිවස අසල වාහනය නවත්වා ඇත.

ආරක්ෂක හේතූන් මත, පෙර මෙන් ට්‍රක් රථය තුළ නිදා ගන්නා ලෙස රණවීර ඔහුට උපදෙස් දී තිබේ.

රාත්‍රී 11.50ට පමණ, පළමු වගඋත්තරකරු වන පොලිස් කොස්තාපල් ජයකොඩි සමඟ පොලිස් කොස්තාපල්වරුන් දෙදෙනෙකු විසින් තමා හදිසියේම අවදි කරන ලද බව පෙත්සම්කරු චෝදනා කරයි.

බලහත්කාරයෙන් ට්‍රක් රථයට ඇතුළු වී ජයකොඩි ඔහුගේ හිසට යතුරුපැදි හිස්වැස්මකින් පහර දුන් බව කියනු ලැබේ.

පෙත්සම්කරු උදව් ඉල්ලා කෑගැසූ විට, නිලධාරීන් ඔහුව එළියට ඇද, බිම හෙළා, ඔහුගේ පිටට සහ පපුවට නැවත නැවතත් පයින් ගැසූ බව පැවසේ.

ඔහුගේ කෑගැසීම් ඇසූ පෙත්සම්කරුගේ බිරිඳ සහ දරුවන් එම ස්ථානයට පැමිණ ඇත.

ඔහු තවදුරටත් කියා සිටියේ තුන්වැනි වගඋත්තරකරු වන තලාටුඔය පොලිස් ස්ථානයේ පොලිස් පරීක්ෂකවරයකු පැමිණ අනෙක් අයට උපදෙස් නිකුත් කළ බවයි.

පසුව නිලධාරීන් තම හිසින් සහ කකුල්වලින් ඔසවා අත්අඩංගුවට ගැනීමට හේතුව දැනුම් නොදී පොලිස් ජීප් රථයකට දැමූ බව ද පෙත්සම්කරු කියයි.

පොලිස් ස්ථානයට යන ගමනේදී, හඳුනා නොගත් නිලධාරීන් විසින් ඔහුට නැවතත් පයින් ගැසූ බව ඔහු කියා සිටී.