අමෙරිකා එක්සත් ජනපදයේ වංචා කරන ලද රුපියල් බිලියන 26ක මුදලක් භාවිත කරමින් ශ්‍රී ලංකාවේ දේපළ අත්පත් කරගත් යුවළකට එරෙහිව ගොනු කර ඇති නඩුවකදී විත්තිකරු විසින් මතු කරන ලද මූලික විරෝධතාවකට එරෙහිව නීතිපතිවරයා විසින් ගොනු කරන ලද අභියාචනයක් ඉදිරියට ගෙන යෑමට ශ්‍රේෂ්ඨාධිකරණය විශේෂ අවසරයක් ලබා දී ඇත.

එසේ කිරීමෙන්, විත්තිකරු විසින් මතු කරන ලද මූලික විරෝධතාව තහවුරු කළ අභියාචනාධිකරණ නියෝගයක් ද ශ්‍රේෂ්ඨාධිකරණය විසින් ඉවත දමන ලදී.

එකම අධිචෝදනා පත්‍රයේ සැමියා සහ බිරිඳ යන දෙදෙනාට කුමන්ත්‍රණය කිරීමේ චෝදනාව එල්ල කළ නොහැකි බවට විත්තිකරු වෙනුවෙන් පෙනී සිටි නීතිඥයන් කොළඹ මහාධිකරණයේ මූලික විරෝධතාවක් මතු කර තිබිණි.

මහාධිකරණය ඔවුන්ගේ විරෝධතාව ප්‍රතික්ෂේප කළ විට, නීතිඥයන් අභියාචනාධිකරණයේ අභියාචනයක් ගොනු කර තිබූ අතර, එමගින් විරෝධතාව තහවුරු කර වැරදි අධිචෝදනා පත්‍රය සංශෝධනය කරන ලෙස නීතිපතිවරයාට නියෝග කළේය.

අභියාචනාධිකරණයේ මෙම තීරණයට එරෙහිව ශ්‍රේෂ්ඨාධිකරණයේ අභියාචනයක් ගොනු කිරීමට නීතිපතිවරයා කටයුතුකළේය.

නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් දිලීප පීරිස් අධිකරණයේදී තර්ක කළේ ස්වාමිපුරුෂයා සහ භාර්යාව වෙනත් පුද්ගලයන් සමඟ කුමන්ත්‍රණයකට සම්බන්ධ නඩුවකදී කුමන්ත්‍රණ චෝදනාවක් එකම අධිචෝදනාවට ඇතුළත් කළ හැකි බවයි.

කොළඹ 7, ඇලෙක්සැන්ඩ්‍රා පෙදෙසේ පදිංචි රියන්සි මහේෂ් කුමාර සහ පුණ්‍ය ප්‍රියන්ති මැණිකේ යන විත්තිකරුවන්ට මෙම අපරාධය සම්බන්ධයෙන් මහාධිකරණයේ අධිචෝදනා ගොනු කර ඇත.

විත්තිකරුට අයත් දේපළ 22ක් අධිකරණය දැනටමත් තහනම් කර ඇත.

විත්තිකරු වෙනුවෙන් පෙනී සිටි ජනාධිපති නීතිඥ නලින් ලද්දුවහෙට්ටි අධිකරණයට පැවසුවේ නීතිපතිවරයාගේ අභියාචනය ලබා දිය නොහැකි බවයි.

කෙසේවෙතත්, කුමුදුනී වික්‍රමසිංහ සහ ජනක් ද සිල්වා යන විනිසුරුවරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ල, ඔවුන් ඉදිරියේ ඇති කරුණු සළකා බැලීමෙන් පසු, නීතිපතිවරයාගේ නියෝගය පසෙකට දමා නීතිපතිවරයාගේ අභියාචනය සඳහා විශේෂ අවසරය ලබා දුන්නේය.

රජයේ නීතිඥ ක්‍රිසංග ප්‍රනාන්දු සහ එන් නිශාන්තන්, දිලීප පීරිස් සමඟ නීතිපතිවරයා වෙනුවෙන් පෙනී සිටියහ.